22.06.2026 | 22:57
Հրդեհ Վիլնյուսի փողոցի շենքերից մեկում․ այրվել է ննջասենյակը՝ գույքով
Ղրղզստանի նախկին նախագահը հրաժարվել է մասնակցել քրեական հեղինակության ապօրինի ազատ արձակման գործի քննությանը
Քաղաքականություն
15.11.2019 | 20:15
Ղրղզստանի նախկին նախագահ Ալմազբեկ Աթամբաևը հրաժարվել է մասնակցել քրեական հեղինակություն Ազիզ Բաթուկաևի ապօրինի ազատ արձակման գործով դատավարությանը։ Այս մասին հայտնում է Interfax-ը:
«Աթամբաևը չի ցանկանում մասնակցել գործընթացին։ Գործի քննությունն առանց նրա անօրինական կլինի»,- ասել է նախկին նախագահի փաստաբան Սերգեյ Սլեսարյովը։
Ըստ նրա՝ Աթամբաևին ստիպողաբար դատարան բերել չեն կարող, քանի որ դա հակասում է Ղրղզստանի Քրեական դատավարության օրենսգրքին:
«Քննությունն անցկացնելն օրենքով անհնար է, առանց օրենքի՝ ամեն ինչ է հնարավոր։ Գործը հատուկ են փակել, որպեսզի հանրությունը չիմանա դրա ընթացքի մասին։ Օրինական հիմքեր չկան։ Ի սկզբանե՝ մի քանի փաստաթուղթ է գաղտնի պահվել, իսկ հետո՝ գործն ամբողջությամբ փակվել»,- ասել է Սլեսարյովը։
Նախաքննական լսումներին Աթամբաևը նույնպես հրաժարվել է մասնակցել և դատարան չի ներկայացել։
Նշենք, որ Ազիզ Բաթուկաևի ապօրինի ազատ արձակման գործում կասկածվում է Ղրղզստանի 19 նախկին չինովնիկ․ այդ թվում՝ Աթամբաևը։ Նրանցից 14-ի հետ համաձայնագիր է կնքվել՝ հետաքննության շրջանակում համագործակցության մասին։
Նշենք, որ 2011-2017 թվականներին Ղրղզստանը ղեկավարած Աթամբաևի դեմ պաշտոնավարման ժամկետի ավարտից հետո մի քանի քրեական գործ է հարուցվել:
Հիշեցնենք, որ այս տարվա օգոստոսի 8-ին Ղրղզստանի իրավապահներն Աթամբաևին ձերբակելել են։
Ավելի ուշ՝ նրան ծանուցումներ են ուղարկվել Ղրզստանի իրավապահ մարմինների աշխատակիցների նկատմամբ բռնություն կիրառելու, սպանություն, մահափորձ և գերեվարում կազմակերպելու, քրեական հեղինակություն Ազիզ Բաթուկաևին բանտարկությունից ապօրինաբար ազատ արձակելու, Բիշքեկի ՋԷԿ-ի վերակառուցման ժամանակ կոռուպցիայի և Բիշքեկում «Ֆորում» արդյունաբերական խմբի շենքի հետ կապված անօրինական գործարքի կասկածանքներով։
Նելլի Մելքոնյան
