Նիկոլ Փաշինյանի հայտարարությունները Մանվել Գրիգորյանի գործով դատավորներին կաշկանդել են․ փաստաբան

ԱԺ նախկին պատգամավոր Մանվել Գրիգորյանի պաշտպան Լևոն Բաղդասարյանն այսօր հրավիրված ասուլիսի ժամանակ ասաց, թե վարչապետ Նիկոլ Փաշինյանը պետք է բարձրաձայնի, որ այս գործով անհրաժեշտ է օբյեկտիվ քննություն իրականացնել. «Գրիգորյանի գործով կաշկանդվածություն կա. վարչապետը ինչ հայտարարություն արել է, եղել է գործի քննության համար ոչ բարենպաստ: Այդ հայտարարությունները դատարաններին ու դատավորին կաշկանդել են»:

Բաղդասարյանը լրագրողներին հայտնեց, որ դժգոհ են նաև նիստերը նախագահող դատավոր Մնացական Մարտիրոյսանից:  «Գրիգորյանի դեմ քրգործով նիստը նախագահող դատավորը, մեծ ջանքեր գործադրելով, պահպանում է իր առջև դրված խնդիրը՝ Գրիգորյանին կալանքի տակ պահել: Գրիգորյանի դեմ հարուցված քրեական գործով արդարադատություն կոչվածն իսպառ բացակայում է»,- ասաց նա:

Վերջին դատական նիստին երկարատև ընդմիջումից հետո դատարան էր բերվել Մանվել Գրիգորյանը, նրա պաշտպանի պնդմամբ Գրիգորյանի վիճակն այնքան է վատացել, որ 2 օր է անհրաժեշտ եղել, որպեսզի նա ուշքի գա։

Պաշտպանը տեղեկացրեց, որ տեղյակ չէ, թե արդյոք հաջորդ նիստին Մանվել Գրիգորյանն ի վիճակի կլինի՞ մասնակցել, թե՝ ոչ։

Մանվել Գրիգորյանը, հիշեցնենք, մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու համար:

Լիլիթ Շաբոյան