27.04.2026 | 12:02
Ռուսական զորքերը զանգվածային հարված են հասցրել Օդեսային. վիրավորվել է 11 մարդ, այդ թվում`2 երեխա
«Բյուջեի այս նախագիծը թերի է». Սերգեյ Բագրատյան. ՏԵՍԱՆՅՈՒԹ
Տնտեսություն
15.11.2019 | 15:24
ԱԺ ԲՀԿ-ական պատգամավոր Սերգեյ Բագրատյանի խոսքով՝ 2020 թվականի բյուջեն տարբեր ոլորտներում չի համապատասխանում այն տեսլականին, որն իրենց խմբակցությունը, որպես ռազմավարական ծրագիր, ներկայացրել էր հանրությանը:
«Այն նախագիծը, որը ներկայացրել է իշխող քաղաքական ուժը, բազմաթիվ ոլորտներում խնդրահարույց է, որը մենք մատնանշել ենք թվերով: Նշել էինք բոլոր այն կետերը, որոնք թերի են, հատկապես՝ այլ ծախսերի մասով բացվածքներ տրված չեն, և մենք համարում ենք, որ այդ նախագիծը թերի է: Իսկ բյուջեի մասին օրենքն այնպիսին է, ինչպես մյուս օրենքները, այսինքն՝ հստակությունը պետք է լինի»,-Ազգային ժողովում լրագրողների հետ զրույցում ասաց Սերգեյ Բագրատյանը:
Նա նաև ընդգծեց՝ բացի այն, որ համաձայն չեն բյուջեի այս նախագծին, նաև առաջարկներ են ներկայացրել: Ավելին՝ քաղաքագիտական իմաստով ճիշտ է, որ ընդդիմությունը չի կարող իշխանության քաղաքական կուրսի հետ համաձայնել:
«Ի վերջո՝ մենք քաղաքական վեճ ունենք, որն արտահայտվում է տնտեսության ցուցիչով: Ինչ վերաբերում է այն խոսակցություններին, թե ԲՀԿ-ն ցուցումներ է ստանում, պետք է ասեմ, որ մենք որևէ ցուցում էլ չենք ստանում, ԲՀԿ-ն ինքնաբավ ուժ է և ունի իր հստակ ծրագիրը, հատկապես՝ տնտեսության զարգացման մասով»,-շեշտեց նա:
Անդրադառնալով ամանօրյա տոնակատարությունների համար հատկացված 300 մլն դրամին և այն հանգամանքին, որ բոլոր ծառայությունները մատուցելու է մեկ ընկերություն, Սերգեյ Բագրատյանն ասաց, որ տնտեսությունում, գնումների մեջ պետք է լինի ազատ մրցակցություն: «Երբեք կողմ չենք եղել և չենք լինելու մեկ մարդուց գնումներին, անպայման առաջարկելու ենք, որ նման բաներն անպայման մրցույթով ու նպատակային լինեն»,- ընդգծեց պատգամավորը:
Հիշեցնենք, որ օրեր առաջ ԲՀԿ-ն հայտարարել էր, որ դեմ է քվեարկելու բյուջեի այս նախագծին:
Մանրամասները՝ տեսանյութում:
Նարեկ Կիրակոսյան
