Դավթաշենի նախկին թաղապետն Իսպանիա է մեկնել

Դավթաշեն վարչական շրջանի նախկին ղեկավար Ռուսլան Բաղդասարյանն Իսպանիա է մեկնել: Նա այս պահին Բարսելոնա քաղաքում է: Նրա փատաբան Հրանտ Անանյանը Factor.am-ի հարցին ի պատասխան ասաց, որ Ռուսլան Բաղդասարյանը երկրից մեկնել է կնոջ առողջության հետ կապված հարցերով:

Պաշտպանի խոսքով՝ նա երկրից հեռացել է իրավապահ մարմիններին տեղյակ պահելուց հետո՝ համապատասխան փաստաթղթեր ներկայացնելով: Ռուսլան Բաղդասարյանը Հայաստանից բացակայելու է երեք օրով: Նա ուրբաթ օրը կրկին վերադառնալու է Երևան:

Հիշեցնենք, որ Բաղդասարյանը մեղադրվում է ՀՀ քրեական օրենսգրքի 179-րդ հոդվածի 3-րդ մասի 1-ին կետով (առանձնապես խոշոր չափերով յուրացում), 314-րդ հոդվածով (պաշտոնեական կեղծիք) և 325-րդ հոդվածի 2-րդ մասով (փաստաթղթերի կեղծում, որը կատարվել է մի խումբ անձանց կողմից նախնական համաձայնությամբ):

Օրեր առաջ Ոստիկանությունը տեղեկացրել էր՝ ըստ քննությանն այս պահին հայտնի տվյալների՝ վարչական շրջանի նախկին ղեկավարի բանավոր հրահանգների հիման վրա համայնքապետարանի տարբեր աշխատակիցներին ու վարչական շրջանի բնակիչներին ֆինանսական օգնություն տրամադրելու վերաբերյալ կազմվել ու ստորագրվել են կեղծ փաստաթղթեր, որոնց հիման վրա 2012-ից 2014 թվականների ընթացքում հափշտակվել է 9․000․000 դրամից ավելի գումար։

Տեղեկությունների հիման վրա նախապատրաստված նյութերով պարզվել է, որ Երևան քաղաքի Դավթաշեն վարչական շրջանի նախկին ղեկավարի աշխատակազմում 2009-ից 2018 թվականն ընկած ժամանակահատվածում տարբեր հաստիքների են հրամանագրվել, բայց փաստացի աշխատանքի չեն հաճախել վարչական շրջանի նախկին ղեկավարի մտերիմները։ Հրամաններով և աշխատանքային պայմանագրով նախատեսված պարտականությունները չկատարելու պարագայում նրանց անվամբ դուրս է գրվել ընդհանուր 41,720,929 դրամ աշխատավարձ, որը վատնման եղանակով հափշտակվել է։ Դավթաշեն վարչական շրջանի նախկին ղեկավար Ռուսլան Բաղդասարյանի նկատմամբ որպես խափանման միջոց կիրառվել է գրավը՝ հինգ մլն դրամ:

Հրանտ Անանյանը մեզ հետ զրույցում նաև նշեց, որ մի քանի օր առաջ, երբ Ռուսլան Բաղդասարյանը կնոջ առողջության հերցերով փորձել է երկրից մեկնել իրավապահները թույլ չեն տվել:

«Իր նկատմամաբ խափանման միջոց ընտրված չի եղել և դատավարական կարգավիճակ չի ունեցել, բայց կնոջ առողջության հետ կապված պետք է մեկներ, ապօրինի սահմանը արգելափակել էին, ինչի համար մենք պաշտոնական դիրքի չարաշահման հաղորդում ենք տվել: Դա եղել էր նոյեմբերի 10-ի գիշերը: Ոստիկանությունը սրա հետ կապված որևէ պարզաբանում չի տվել»,- ասաց փաստաբանը:

Նարեկ Կիրակոսյան