04.08.2026 | 11:26
Արման Անտոնյանը հայտնել է ԿԳՄՍ նախարարի խորհրդականի պաշտոնից հեռանալու մասին
Ղարաբաղի հարցի լուծման նախադրյալների մասով մեր պատկերացումներն ավելի լավ ընկալում են ստացել. վարչապետ. ՏԵՍԱՆՅՈՒԹ
Քաղաքականություն
13.11.2019 | 19:48
Կառավարություն-ԱԺ հարցուպատասխանի ժամանակ «Իմ քայլը» խմբակցության պատգամավոր Վիկտոր Ենգիբարյանը մեջբերեց օրերս Հայաստան ժամանած ՌԴ արտգործնախարար Սերգեյ Լավրովի՝ Արցախը բանակցային սեղան վերադարձնելու հարցի վերաբերյալ հայտարարությունը:
Ապա պատգամավորը նշեց, որ ինքն այստեղ ուղերձների լրջագույն փոփոխություն է տեսնում և հարց հղեց վարչապետ Նիկոլ Փաշինյանին, թե որքանո՞վ է այս փոփոխվող մոտեցումը նաև համանախագահող մյուս պետություններում տեղ գտել։
Փաշինյանն ասաց, որ իրականում չէր խոսի փոփոխվող ուղերձների մասին, որովհետև ԵԱՀԿ ՄԽ համանախագահող երկրների հետ Ղարաբաղի հարցի վերաբերյալ բանակցային գործընթացը զարգացող, կենդանի գործընթաց է:
«Կարող եմ արձանագրել ուղղակի հետևյալը, որ ՀՀ-ում տեղի ունեցան քաղաքական փոփոխություններ, ինչ-որ տեղ բնական մտավախություններ առաջացան, թե ինչքանով ՀՀ նոր կառավարության դիրքորոշումները կլինեն կառուցողական՝ Արցախի հարցի լուծման առումով։ Իհարկե, մենք հենց առաջին օրերից հանդես եկանք մի շարք հարցադրումներով, որոնք, իհարկե, նոր էին կամ լավ մոռացված հինն էին, կամ նոր կոմպոնենտներ էին պարունակում: Ի՞նչ է փոխվել այս 1.5 տարվա ընթացքում: Այս ընկալման մեջ փոխվել է հետևյալը, որ մեր բոլոր գործընկերներն արձանագրել են ոչ միայն մեր մտադրությունների մեջ չէ բանակցային գործընթացը փակուղի մտցնելը, այլև, ընդհակառակը, մենք ասում են, որ կան բազմաթիվ հարցեր առանց որոնց ճշգրտման արդյունավետ բանակցային գործընթաց տանել հնարավոր չէ»,- նշեց վարչապետը:
Փաշինյանի կարծիքով՝ այս ըմբռնման առումով որոշակի ընդհանուր ընկալումներ են ձևավորվել, այսպես ասած, նախադրյալների առումով:
«Կարծում եմ՝ հարցի լուծման նախադրյալների մասով մեր պատկերացումներն ավելի լավ ընկալում են ստացել, որովհետև արձանագրվել է, որ մեր դիրքորոշումները կառուցողական են»,- նկատեց Նիկոլ Փաշինյանը։
Մանրամասները՝ տեսանյութում:
