28.03.2026 | 19:57
Սպասվում են տեղումներ. լեռնային գոտիներում՝ թաց ձյան, նախալեռնային և հովտային գոտիներում՝ անձրևի տեսքով
Արևելյան գործընկերության երկրների մեդիա-համաժողով՝ նվիրված տնտեսական կայունության և ապագա դոնորային աջակցության ձևավորման հարցերին
Քաղաքականություն
12.11.2019 | 19:31
Նոյեմբերի 13-ից 14-ը Լատվիայի մայրաքաղաք Ռիգայում տեղի կունենա «Արևելյան գործընկերության երկրների մեդիա-համաժողով 2019. բիզնես և կայունություն» խորագրով համաժողովը, որը կազմակերպել է Եվրահանձնաժողովը՝ Եվրոպական արտաքին գործերի ծառայության և Լատվիայի կառավարության աջակցությամբ:
Այն կհամախմբի ԶԼՄ-ների, դրանց զարգացմամբ զբաղվող կազմակերպությունների ու դոնորների ավելի քան 100 ներկայացուցիչների՝ Եվրամիությունից և գործընկեր երկրներից:
Սա 2017 թվականին անցկացված Արևելյան գործընկերության երկրների երկրորդ մեդիա-համաժողովի շարունակությունն է, որի շրջանակում տնտեսական կայունությունը ճանաչվել է առանցքային մարտահրավեր, որին առերեսվում է արհեստավարժ լրագրությունն ամբողջ տարածաշրջանում:
Նշենք, որ համաժողովին կմասնակցեն և բացման խոսքով հանդես կգան Եվրահանձնաժողովի Հարևանության քաղաքականության և ընդլայնման բանակցությունների հարցերով գլխավոր տնօրինության (DG NEAR) Վրաստանի, Մոլդովայի և հարևանության միջսահմանային համագործակցության զարգացման հարցերով տնօրեն Մաթյո Բուսկեն, Եվրոպական արտաքին գործերի ծառայության Արևելյան գործընկերության, տարածաշրջանային համագործակցության և ԵԱՀԿ հարցերով բաժնի ղեկավարի տեղակալ Ռադոսլավ Դարսկին ու Լատվիայի արտաքին գործերի նախարարության պետական քարտուղար Անդրիս Պելշսը:
Հավաքի ընթացքում կներկայացվեն ԶԼՄ-ների կարիքների համապարփակ գնահատման արդյունքները: Ուսումնասիրությունը կատարվել է Հանձնաժողովի պատվերով և անցկացվել ԱլԳ երկրներում: ԱլԳ երկրների լրատվամիջոցների ներկայացուցիչներն իրենց հերթին կներկայացնեն դեպքերի ուսումնասիրություններ՝ ընդգծելով, թե ինչպես են իրենց կազմակերպությունները մշակել հաջողակ բիզնես մոդելներ ու բարելավել սեփական ֆինանսական կայունությունը:
Վերջին նիստը հարթակ կտրամադրի դոնորներին, որոնք կքննարկեն ԱլԳ երկրներում իրենց գործողությունները, ինչպես նաև տարածաշրջանում անկախ լրատվամիջոցների տարբեր կարիքների բավարարմանն ուղղված ռազմավարությունները:
Համաժողովը կեզրափակվի ամփոփիչ նիստով, որում ի մի կբերվեն միջոցառման արդյունքներն ու ներկայացված առաջարկները: Դրանք կնպաստեն Արևելյան գործընկեր երկրներում ԶԼՄ-ներին ուղղված ապագա օժանդակության շրջանակի ձևավորմանը:
