Իսրայելը ոչնչացրել է «Իսլամական ջիհադի» հրամանատարին. պաղեստինյան խմբավորումը կոշտ պատասխան է խոստացել

Իսրայելական ռազմաօդային ուժերը հարվածներ են հասցրել պաղեստինյան «Իսլամական ջիհադ» խմբավորման հրամանատար Աբու ալ-Աթայի՝ Գազայի հատվածում գտնվող տան ուղղությամբ: Խմբավորման առաջնորդը զոհվել է: Այս մասին գրում է ՌԲԿ-ն՝ վկայակոչելով Reuters-ը:

Իսրայելի Պաշտպանության բանակի հաղորդագրության մեջ նշվում է, որ ալ-Աթան «հարյուրավոր ահաբեկչական հարձակումների մասնակից» է, որոնց թիրախում եղել են ինչպես զինվորականներ, այնպես էլ խաղաղ բնակիչներ:

Այլ աղբյուրների համաձայն՝ իսրայելական հարվածների հետևանքով զոհվել է նաև 42-ամյա ալ-Աթայի կինը՝ Ասման: Եվս հինգ մարդ, որոնց թվում՝ 4 երեխա, վիրավորվել է:

Պաղեստինյան «Իսլամական ջիհադ» խմբավորումն իր հրամանատարի մահվան համար կոշտ արձագանքով է սպառնացել:

«Այս հանցագործությանն արձագանքը սահմաններ չի ունենալու, պատասխանը համարժեք կլինի թշնամու կողմից իրագործված հանցագործության մասշտաբին: Հայտարարում ենք լիարժեք մարտական պատրաստականության և մեր մարտիկների մոբիլիզացիայի մասին»,- հայտարարել են խմբավորման զինյալները:

Նշենք, որ Աբու ալ-Աթային ոչնչացնելուց հետո Իսրայելի ուղղությամբ մի քանի հրթիռ է արձակվել: Տեղեկությունների համաձայն՝ Թել Ավիվի հարավային շրջաններում մի քանի անգամ օդային տագնապի ազդանշան է տրվել:

Գազայի հատվածից բացի՝ Իսրայելը հարվածներ է հասցրել նաև սիրիական Դամասկոսի ուղղությամբ: Այստեղ էլ թիրախում «Իսլամական ջիհադ»-ի մեկ այլ բարձրաստիճան զինյալ է եղել՝ Աքրամ ալ-Աջուրին: Իսրայելի իշխանությունները պաշտոնապես չեն հաղորդել հարևան պետության մայրաքաղաքի ուղղությամբ հարվածների մասին, սակայն այդ մասին հայտնել է սիրիական պետական ՍԱՆԱ գործակալությունը:

Որոշ տվյալներով՝ արդեն Իսրայել է մեկնել եգիպտական հետախուզության պատվիրակությունը, որն ավանդաբար, Գազայի հատվածում իրադրության սրման ժամանակ, հանդես է գալիս որպես միջնորդ: