07.11.2026 | 20:28
Նարեկ Կարապետյանի հանդիպումը համախմբման կոչին արձագանքած ուժերի հետ. ՈՒՂԻՂ
ԱՄՆ-ը կլիմայի հարցով Փարիզյան համաձայնագրից դուրս գալու գործընթաց է սկսել
Քաղաքականություն
05.11.2019 | 20:26
ԱՄՆ նախագահ Դոնալդ Թրամփի աշխատակազմը սկսել է կլիմայի հարցով Փարիզյան համաձայնագրից դուրս գալու պաշտոնական գործընթացը։ Այս մասին հաղորդում է Reuters-ը՝ վկայակոչելով պետքարտուղար Մայք Պոմպեոյի հայտարարությունը։
«Նախագահ Դոնալդ Թրամփը դեռ 2017 թվականի հունիսի 1-ին հայտարարել էր պայմանագրից դուրս գալու որոշման մասին, քանի որ այն ոչ թափանցիկ տնտեսական պարտավորություններ է դրել ամերիկացի աշխատողների, հարկատուների և ամերիկյան բիզնեսի վրա»,- ասել է Պոմպեոն։
Ըստ նրա՝ միջազգային քննարկումների շրջանակում իրենք կշարունակեն բարեփոխել և զարգացնել տնտեսությունը՝ արտանետումների կրճատմանը զուգահեռ։ Եվրամիությունում ԱՄՆ-ի այս որոշումը հիասթափությամբ են ընդունել։ Ֆինլանդիայի Շրջակա միջավայրի նախարար Քրիստ Միկոնեն ասել է․ «Փարիզյան համաձայնագրից ԱՄՆ-ի դուրս գալը նշանակում է, որ մյուսները պետք է ավելի մեծ թափով շարունակեն համագործակցությունը։ Մենք կշարունակենք աշխատել ամերիկյան նահանգների, քաղաքների ու քաղհասարակության հետ՝ կլիմայի պաշտպանությանն ուղղված գործընթացներին աջակցելու նպատակով»։
Հիշեցնենք, որ կլիմայի հարցով Փարիզի համաձայնագիրն ընդունվել է 2015 թվականի դեկտեմբերի 12-ին։
Նելլի Մելքոնյան
