Իրանը հայտարարել է միջուկային գործարքի պարտավորությունների կրճատման նոր փուլի մասին

Իրանի նախագահ Հասան Ռոհանին հայտարարել է, որ նոյեմբերի 6-ից մեկնարկելու է 2015 թվականին կնքված միջուկային գործարքով պարտավորությունների կրճատման չորրորդ փուլը։ Այս մասին գրում է ԻՌՆԱ-ն:

Ըստ Ռոհանիի՝ Իրանը սկսելու է Ֆորդոյի միջուկային կայանում ուրան պարունակող գազով 1044 նոր ցենտրիֆուգ լիցքավորել: Նախագահը պաշտպանել է նաև Իրանի կողմից ցանկացած տեսակի ցենտրիֆուգ արտադրելու իրավունքը:

Իրանի նախագահը նաև հավելել է, որ այս քայլը, ինչպես և նախորդ փուլը, կարելի է դադարեցնել:

«Երբ նրանք վերադառնան միջուկային գործարքով ստանձնած իրենց պարտավորությունների կատարմանը, մենք նույնպես կվերադառնանք մեր պարտավորություններին»,- ասել է Ռոհանին՝ միաժամանակ հավելելով, որ Թեհրանը չի պատրաստվում միակողմանի կատարել պարտավորությունները:

Հասան Ռոհանին նաև հայտարարել է խնդիրների լուծման համար մի շարք երկրների հետ բանակցությունները շարունակելու մասին: Իրանը միջուկային գործարքի մասնակից երկրներին 60 օր ժամանակ է տվել բանակցությունների համար:

«Եթե մենք կարողացանք լուծումներ գտնել՝ պատժամիջոցները չեղարկելու, նավթի վաճառքի և բանկային հարաբերությունների կարգավորման համար, ապա կվերադառնանք միջուկային գործարքով պարտավորությունների կատարմանը»,- հավելել է Ռոհանին:

Ավելի վաղ՝ Իրանի ԱԳՆ պաշտոնական ներկայացուցիչ Աբբաս Մուսավին նշել է, որ միջուկային պայմանագրի եվրոպական կողմերի, մասնավորապես՝ Ֆրանսիայի կողմից պարտավորությունների կատարումը շոշափելի արդյունքների չի բերել։