09.10.2026 | 22:57
Կարո՞ղ է Իսրայելը բաժանել Բաքվին և Անկարային․ ինչի կարող են հանգեցնել վերջին հակասությունները․ BBC-ի անդրադարձը
Ռուսական ORSIS-ը մեկնաբանել է ՀՀ-ում զենքի մրցույթի տապալումը
Քաղաքականություն
05.11.2019 | 14:29
«Промтехнология» ընկերությունը (ORSIS դիպուկահար զենքի արտադրողը) ՀՀ Պաշտպանության նախարարության կողմից ոչ պաշտոնական հրավեր է ստացել՝ գերատեսչության համար զենքի խմբաքանակի մատակարարման չկայացած պայմանագրի խնդիրը կարգավորելու համար: Այս մասին ՏԱՍՍ-ին հայտնել է ORSIS-ի ներկայացուցիչը:
Աղբյուրի փոխանցմամբ՝ ընկերությանը ոչ պաշտոնական դիմումների փորձեր են եղել նաև իբր ՀՀ Պաշտպանության նախարարությանը մերձավոր անձանց կողմից:
«Մենք ՀՀ ՊՆ-ից բանակցությունների սեղանի շուրջ նստելու ոչ պաշտոնական հրավեր ենք ստացել: Ընկերությանը նաև ՊՆ-ին մերձավոր անձանց կողմից դիմելու փորձեր են արվել: Կարծում ենք, որ այս դեպքում դա ոչ կոռեկտ և անթույլատրելի է, երկխոսությունը պետք է պաշտոնական լինի»,- ասել են ընկերությունում:
«Промтехнологии» ընկերությունում, միաժամանակ, հույս են հայտնել, որ խնդիրը դատական կարգով լուծման չի հասնի:
Ընկերությունում հիշեցրել են, որ ի նշան բողոքի զենքի խոշոր խմբաքանակի փակ մրցույթից հանելու դեմ՝ նամակ է ուղարկվել ՀՀ պաշտպանության նախարար Դավիթ Տոնոյանի անունով:
«Ամենավրդովեցնող փաստն այն է, որ նախորդ գործողություններից հետո փորձել են մեզանից ապօրինաբար բանկային երաշխիք ստանալ, ինչի իրավունքը ՊՆ-ն չուներ: Մենք մի քանի պաշտոնական նամակ ենք ուղարկել նախարարի անունով՝ հանդիպման խնդրանքով, բայց ոչ մի պաշտոնական պատասխան չենք ստացել: Եթե, ենթադրենք, մրցույթին վեց ընկերություն մասնակցեր և մեկը հաղթեր, իսկ մյուսնե՞րը: Յուրաքանչյուրից պահանջելու էին բանկային երաշխիքի գումա՞ր վճարել: Օրենքով նման բան չկա, մենք այս հարցերի պատասխանները չենք ստացել»,- ասել են ORSIS-ում:
Այս տարվա օգոստոսին ռուսական ORSIS ընկերության՝ Հայաստանում գրանցված «Օրսիս Արմս»-ի փաստաբանը ՏԱՍՍ-ին հաղորդել էր, որ ՀՀ ՊՆ-ի կողմից զենքի ձեռքբերման փակ մրցույթից հանելու առիթով երկրի ՔԿ-ում քրեական գործ է հարուցվել: Հոկտեմբերի վերջին լրատվամիջոցներում տեղեկություններ հրապարակվեցին, որ ՌԴ-ն պատրաստվում է բողոքի նոտա հղել Հայաստանին՝ զենքի մրցույթի խափանման համար, սակայն ՏԱՍՍ-ի աղբյուրները հայտնեցին, որ այդ տեղեկությունը չի համապատասխանում իրականությանը:
Հիշեցնենք, որ factor.am-ը անդրադարձել էր թեմային՝ իր ««Եղել է հանցավոր արարք»․ ո՞վ և ի՞նչ նպատակով է փորձել ռազմականի փոխարեն որսորդական ռազմամթերք մատակարարել ՀՀ ՊՆ-ին. ОRSIS-ի գործով նոր մանրամասներ» վերտառությամբ նյութում:
