12.08.2026 | 23:30
Աճել են դեղորայքից և կենցաղային քիմիական նյութերից երեխաների թունավորման դեպքերը. Ավանեսյան
23 տարի անազատության մեջ գտնվելուց հետո ցմահ դատապարտյալն ազատ արձակվելու հույս ունի. գործը Վերաքննիչ դատարանում է. ՏԵՍԱՆՅՈՒԹ
Հասարակություն
04.11.2019 | 16:39
Այսօր առավոտյան Վերաքննիչ դատարանի դիմաց էին հավաքվել ցմահ դատապարտյալ Աշոտ Մանուկյանի հարազատները։ 23 տարի անազատության մեջ գտնվելուց հետո Աշոտ Մանուկյանը դիմել էր դատարան՝ վաղաժամկետ ազատ արձակվելու հույսով։
Առաջին ատյանի դատարանը, սակայն, մերժեց նրա դիմումը։ Որոշումը պաշտպանները բողոքարկել են։
Մանուկյանը 1996 թվականին երեք զինծառայողների սպանության համար գնդակահարության էր դատապարտվել, բայց 2003 թվականին, ինչպես գնդակահարության դատապարտված այլ անձանց, այնպես էլ նրա պատիժը փոխարինվել է ցմահ ազատազրկմամբ:
Սպանությունից 23 տարի անց զոհերի հարազատները ներել են Աշոտին և դեմ չեն նրա ազատ արձակմանը, բայց պետությունը չի ներում նրա արարքը։ Ցմահ դատապարտյալի մայրը լրագրողներին ասաց՝ դատարանից ակնկալում է արդար դատաքաննություն։
Նա նշեց, որ որդին հանցանքը կատարելիս եղել է 19 տարեկան, այս տարիներին բազմիցս զղջացել է իր արարքի համար։
Այսօրվա դատական նիստը հետաձգվեց, քանի որ ցմահ դատապարտյալը դատարան չէր բերվել։ Քրեակատարողական ծառայության ներկայացուցիչը խուսափեց լրագրողների հետ զրույցից, իսկ Մանուկյանի պաշտպան Միհրան Պողոսյանն ասաց՝ դատարանները ցմահներին մերժելով՝ փորձում են խուսափել նրանց խնդիրներին լուծում տալուց: Պաշտպանը տեղեկացրեց, որ վերջերս Մանուկյանի պատժի կրման ռեժիմը փոփոխվել է:
Միհրան Պողոսյանը նկատեց նաև, որ իր պաշտպանյալի վաղաժամկետ ազատման դիմումը մերժելուց դատարանը չի նշել, թե դատապարտյալի ո՞ր արարքներն են ենթակա ուղղման։
Այս գործով հաջորդ դատական նիստը նշանակվեց դեկտեմբերի 2-ին։ Եթե դատարանն այս անգամ ևս մերժի ցմահ դատապարտյալի դիմումը, ապա նա վաղաժամ ազատ արձակման համար կկարողանա դիմել միայն 3 տարի անց։
Մանրամասները՝ տեսանյութում։
Լիլիթ Շաբոյան
