«ՍՈՒ-4» ինքնաթիռները Հայաստան կհասնեն դեկտեմբերին կամ հունվար-փետրվարին. Դավիթ Տոնոյան. ՏԵՍԱՆՅՈՒԹ

Պաշտպանության նախարար Դավիթ Տոնոյանի խոսքով, եթե վերցնում են ռազմական ոլորտի գերնպատակը և եղած մարտահրավերները, ապա, որպես պաշտպանության նախարար, կցանկանար կրկնապատկել ու եռապատկել ոլորտին տրամադրվող բյուջեն: Սակայն հաշվի առնելով երկրի բյուջեն, տնտեսական հանարավորությունները, ապա այսօրվա բյուջեն բավարար է, որպեսզի բոլոր մարտահրավերներին պատշաճ ձևով արձագանքեն:

Նախարարը հերքեց, որ այս տարին ռազմական ոլորտին տրամադրվող բյուջեն կրճատվել է: «Բյուջեի կառուցվածքում եղել են որոշ նվազեցումներ մեզ տրամադրվող վարկային չափաբաժնի մեջ, որն ուղղվել է մեր մեր կարողությունների ավելացմանը»,- նշեց նախարարը:

Ըստ նրա, «ՍՈՒ-4» ինքնաթիռները Հայաստան կհասնեն կա՛մ դեկտեմբերին, կա՛մ հաջորդ տարվա հունվար-փետրվարին: Նա նաև ընդգծեց, որ Հայաստանը ձեռք կբերի նոր, արդիական զինատեսակներ, դրանք Հայաստան կբերվեն տարբեր երկրներից:

Անդրադառնալով ռուսական ռազմաբազայի արդիականացմանը՝ Դավիթ Տոնոյանը տեղեկացրեց, որ այն արդիականացվում է սպառազինության, նյութատեխնիկական ապահովման, ինչպես նաև զինվորների կենցաղային պայմանների բարելավման տեսանկյունից:

«Հողատարածքի ավելացումներ չեն լինելու, որովհետև լինում են տարբեր տարբերակումներ, քանի որ ինչ-որ տարածք տրամադրվում է, ինչ-որ տարածք արդեն չի օգտագործվում և անցնում է Պաշտպանության նախարարությանը, բայց դրանք մնում են ՀՀ տարածք, որոնք պարզապես տրվում են օգտագործման համար»,-շեշտեց նախարարը:

Մանրամասները՝ տեսանյութում:

Նարեկ Կիրակոսյան