10.01.2025 | 23:14
ՊԵԿ նախագահն ընդունել է Հնդկաստանի դեսպանին
Թուրքիայում դատախազության հրամանով զինվորները կոտրել են քրդերեն գրությամբ գերեզմանաքարը
Քաղաքականություն
02.11.2019 | 13:12
Մուշի Բուլանըք շրջանի Էրենթեփե գյուղում դատախազության հանձնարարականով զինվորները կոտրել և տարել են 2012թ. հունիսի 6-ին բանտում մահացած, Թուրքիայի «Խաղաղություն և ժողովրդավարություն» կուսակցության (BDP-ԽԺԿ) գյուղական կառույցի ղեկավար Այդըն Քայայի գերեզմանաքարը. գրում է ermenihaber-ը:
Աղբյուրի փոխանցմամբ` Այդըն Քայայի գերեզմանաքարի վրա քրդերեն գրություն կար` «Քեզ չենք մոռանալու» (Em te ji bîr nakin):
Քայայի ավագ եղբայրը` Հյուսեյին Քայան «Mezopotamya» լրատվական գործակալությանը տված հարցազրույցում հայտնել է, որ իրեն հոկտեմբերի 27-ին կանչել են շրջանային ոստիկանական վարչություն, սակայն ինքը հոկտեմբերի 29-ին է ներկայացել:
Նրա խոսքով` ոստիկանության հրամանատարը նրան ցույց է տվել եղբոր` Այդըն Քայայի գերեզմանի լուսանկարը և ապա հարցրել, թե ի՞նչ է նշանակում գերեզմանաքարի գրությունը:
Հյուսեին Քայան պատասխանել է, որ քրդերեն գրված է` «Քեզ չենք մոռանալու» և այլ իմաստ չունի:
«Այնուհետև ինձ ասաց, որ դատախազությունը հրահանգել է, որպեսզի քանդեն այս գերեզմանաքարը: Զինվորների հետ միասին գնացինք գերեզման: Քարագործ վարպետի էլ էինք կանչել, սական նա չկարողացավ քարը հանել, որից հետո զինվորները ինձ ասացին, որ հրաման կա և կոտրեցին գերեզմանաքարն ու տարան»,-ասել է Հյուսեին Քայան:
Այդըն Քայայի եղբայրը նաև նշել է, որ որևէ փաստարկ չեն ներկայացրել, թե ինչու են զինվորները քանդում և տանում գերեզմանաքարը:
Այս դեպքը Թուրքիայի ընդդիմադիր քրդամետ «Ժողովուրդների դեմոկրատական» կուսակցության (ԺԴԿ-HDP) Մուշի պատգամավոր Մենսուր Ըշըքը խորհրդարանի օրակարգ է տեղափոխել:
