Երևանում բացված նոր կարի ֆաբրիկայի արտադրանքը բացառապես Եվրոպա կարտահանվի. ՏԵՍԱՆՅՈՒԹ

Երևանում բացվել է իտալական «Սարտիս» և հայկական «Ալեքս տեքստիլ» ընկերությունների համատեղ հիմնադրած «Սարտեքս» կարի ֆաբրիկան, որն իտալական «Սարտիս» ընկերության գործընկերն է Հայաստանում։ Այն զբաղեցնում 15 հազ․ քմ տարածք՝ ներառելով չորս ընկերություն՝ հայ-չինական «Ասա Գարմենտ», հայ-ֆրանսիական «Տեքսաս փրոդաքշն», ինչպես նաև «Ալեքս-տեքստիլ» և «Սարտեքս» ընկերությունները։

«Արտադրվում է իտալական Max Mara, Mocler, Peuterey, Dolce&Gabana, Dainese բրենդների հագուստը, որը ներքին սպառման համար չէ, ամբողջությամբ արտահանվում է եվրոպական շուկա»,- նշեց «Սարտեքս»-ի գործադիր տնօրեն Մխիթար Աղաբեկյանը։

Նրա խոսքով՝ ֆաբրիկայի շնորհիվ 400 նոր աշխատատեղ են ստեղծել՝ ընդգրկելով նաև մարդկանց, որոնք փորձ չունեն։

«Շահագործվում է արտադրական 7 հոսքագիծ։ Նախատեսում ենք թիվը 40-ի հասցնել, ինչը մեզ թույլ կտա մինչև 2500 աշխատակից ունենալ։ Այս թվին պլանավորում ենք երկու տարում հասնել։ Մեր նպատակն է ստեղծել այնպիսի մշակույթ, որ Հայաստանում տեքստիլը չզարգանա միայն նրա համար, որ աշխատուժն էժան է։ Մենք ուզում ենք, որ «Made in Armenia» տարբերշանը որակի երաշխավոր լինի»,- ընդգծեց Աղաբեկյանը։

Կարի ֆաբրիկայի բացմանը ներկա էին նաև ՀՀ վարչապետ Նիկոլ Փաշինյանը, Ազգային ժողովի նախագահ Արարատ Միրզոյանը, էկոնոմիկայի նախարարի տեղակալ Ավագ Ավանեսյանը և ԱԺ նախկին պատգամավոր Սամվել Ալեքսանյանը, որոնք շրջայցի ընթացքում ծանոթացան գործարանի աշխատանքին։

Մանրամաները՝ տեսանյութում։

Նելլի Մելքոնյան