«ՀՔԾ-ն գործ կոծկող չէ». Սասուն Խաչատրյանը՝ Միքայել Մինասյանին վերագրվող «ՁորաՀԷԿ»-ի սեփականաշնորհման գործի մասին

Հատուկ քննչական ծառայության ղեկավար Սասուն Խաչատրյանը չի ցանկանում «ՁորաՀԷԿ»-ի սեփականաշնորհման քրգործով մանրամասներ փոխանցել:

Factor.am-ի հարցին, թե գործի շրջանակներում ինչ մանրամասներ են բացահայտվել, Սասուն Խաչատրյանն ասաց. «Այդ գործի հետ կապված տեղեկություններ չեմ ցանկանում հիմա փոխանցել: Չեմ ցանկանում, որովհետև նպատակահարմար չեմ գտնում»:

Հիշեցնենք, որ վարչապետ Նիկոլ Փաշինյանը Վանաձորում կայացած իր ասուլիսի ժամանակ Factor.am-ի հարցին ի պատասխան անդրադարձել էր Սերժ Սարգսյանի փեսա Միքայել Մինասյանի կողմից ռազմավարական նշանակության օբյեկտի սեփականաշնորհմանը: «Ես հիմա չեմ ուզում այնպիսի հայտարարություն անել, որը նախաքննության առումով զուտ խնդիրներ կառաջացնի, բայց Միքայել Մինասյանը Հայաստանի շատ օբյեկտների սեփականատեր է եղել և մինչև օրս շարունակում է մնալ, ուրիշ բան, որ այդ սեփականությունը գրանցված է եղել մի կնոջ անունով, որի անունը ոչ մեկի ոչ մի բան չի ասում։ Իզուր են նաև իրենք ձև անում, թե իրենք տեղյակ չեն, թե ինչի մասին է խոսքը»,- ասել էր նա։

Մեր դիտարկմանը, որ այս օրերին լայնորեն շրջանառվում են տեսակետներ, որ գործը կոծկվում է, քանի որ վարչապետի հայտարարությունից տևական ժամանակ անց որևէ իրավապահ մարմին նորություն չի հայտնել, Սասուն Խաչատրյանն արձագանքեց. «Գործը չի կոծկվում, ՀՔԾ-ն գործ կոծկող չէ»:

Արդյոք գործի շրջանակներում եղե՞լ են անձինք, որ հարցաքննվել են կամ բացատրություն են տվել․ Սասուն Խաչատրյանն այս հարցերի շուրջ ևս չցանկացավ մեկնաբանություն տալ․ «Քրեական գործով նախաքննական գաղտնիքի խնդիր կա, նախաքննության արդյունավետության խնդիր կա, այդ պատճառով չեմ ցանկանում բարձրաձայնել»:

Նարեկ Կիրակոսյան