Քաղաքականություն
31.10.2019 | 17:45Շուրջ մեկ ամիս է՝ Վայոց Ձորում դաժան ծեծի ենթարկված փոխգնդապետ Արա Մխիթարյանը գտնվում է կոմայի մեջ։ Մինչ բարձրաստիճան սպան շարունակում է պայքարել կյանքի համար, այսօր Կառավարության նիստում Վայոց Ձորի մարզպետ նշանակվեց նրան դաժան ծեծի ենթարկած նախկին մարզպետի օգնական Հարություն Գրիգորյանի փաստաբանը։
Արա Մխիթարյանի եղբայրը՝ Կարեն Մխիթարյանը Factor.am-ին փոխանցեց, որ եղբոր վիճակը շարունակում է մնալ ծայրահեղ ծանր, նա կոմայից դեռ դուրս չի եկել։
Փոխգնդապետ Արա Մխիթարյանը ծանր մարմնական վնասվածքներ ստացել էր Եղեգնաձորի շենքերից մեկի բակում տեղի ունեցած վիճաբանության ժամանակ: Նրան դաժան ծեծի ենթարկելու համար երկու անձ կալանավորված է։
Նախկին մարզպետի մասնակցությունը միջադեպին ստուգելու համար իրավապահներն առգրավել են դեպքի հարակից տարածքում առկա տեսախցիկները։ Այս մասին երեկ մանրամասներ հայտնեց նաև ՀՀ Քննչական կոմիտեի ղեկավարը՝ ասելով, որ հակասական իրավիճակում են հայտնվել. մի կողմը պնդում է մարզպետի մասնակցության մասին, տեսախցիկները վկայում են հակառակը, որ նա այդ ժամին տանն է եղել։
Մարզպետի օգնականի կալանավորումից երկու օր անց Վայոց Ձորի մարզպետ Տրդատ Սարգսյանը հայտարարեց հրաժարական ներկայացնելու մասին։ Այսօր հաստատվեց, որ նրան կփոխարինի իր օգնականի փաստաբանը՝ Արարատ Գրիգորյանը։
Նորանշանակ մարզպետը լրագրողներին ասաց, այդ հանգամանքն իրեն չի կաշկանդի աշխատել մարզպետի պաշտոնում, բայց փաստաբանական գործունեությունը կդադարեցնի։ Գրիգորյանը չի կարծում, թե Տրդատ Սարգսյանի հրաժարականը ձևական բնույթ էր կրում, միևնույն ժամանակ պնդում է՝ ինքը դեմ է բռնությանը։
Փոխգնդապետին ծեծի ենթարկելու գործով նախաքննությունը դեռևս շարունակվում է։
Մանրամասները՝ տեսանյութում։
Լիլիթ Շաբոյան
