21.05.2026 | 15:28
«Ուժեղ Հայաստան» կուսակցության քարոզարշավը Արագածոտնում. ՈՒՂԻՂ
Եթե ինձ ձերբակալելով Մարտի 1-ը, Հոկտեմբերի 27-ը կհամարվի ամբողջովին բացահայտված, թող ձերբակալեն. Սերժ Սարգսյան
Քաղաքականություն
30.10.2019 | 20:46
Իմ անձի հետ կապված ես վախենալու որևէ բան չունեմ։ Այս մասին այսօր՝ հոկտեմբերի 30-ին Անդրանիկ Մարգարյանի քաղաքական դպրոցի շրջանավարտներին վկայականների հանձնման արարողությունից հետո ասել է ՀՀ երրորդ նախագահ Սերժ Սարգսյանը՝ պատասխանելով շրջանավարտներից մեկի հարցին՝ արդյո՞ք չի վախենում, որ ձերբակալությունների շղթան իրեն էլ կհասնի, գրում է News.am-ը:
«Ինչպես հայտնի է՝ ոչինչից չի վախենում միայն կատարյալ հիմարը։ Ես 1988 թվականից հետո իրոք վախեցել եմ: Վախեցել եմ կորցնել մեր հայրենիքի մի մասը՝ Լեռնային Ղարաբաղը, ինչը շատ մեծ և իրական վտանգ կբերեր մեր հայրենիքի մնացած և վերջին մասին համար։ Բայց տասնյակ հազարավոր նվիրյալների հետ միասին նայելով վախի աչքերի մեջ՝ մենք կարողացել ենք հաղթահարել այդ վախը պատերազմի՝ ձեզ հայտնի արդյունքներով։ Ես հիմա էլ եմ վախենում անպատասխանատու պոպուլիստների՝ մեր հայրենիքի համար կործանարար քաղաքականությունից»,- ասել է նա:
Սերժ Սարգսյանը, սակայն, հավելել է, որ իր անձի հետ կապված վախենալու որևէ բան չունի. «Եթե ինձ ձերբակալելով մեր ժողովուրդը գոհ ու երջանիկ կլինի, Մարտի 1-ը, Հոկտեմբերի 27-ը կհամարվի ամբողջովին բացահայտված, մեր երկրին սպառնացող վտանգները կչեզոքանան, ԼՂ բանակցությունները կվերադառնան ճիշտ ուղի, թող ձերբակալեն»:
Նրա խոսքով՝ վախկոտ են համարվում այն մարդիկ, որոնք ինչ-որ ազդեցությունների հետևանքով հաճախ փոխում են իրենց որոշումները:
«Ես որոշում փոխող չեմ: Եթե իմ բացակայությունը հասարակությունից կնպաստի, որ տնտեսական հեղափոխությունը մեծ թափ ստանա և հայրենադարձների հոսքը Հայաստան այնքան մեծանա, որ մենք դրանով ուղղակի կհպարտանանք, թող ձերբակալեն»,- հայտարարել է Սերժ Սարգսյանը:
Նախկին նախագահն ընդգծել է, որ ավելին չի ուզում ասել, քանի որ խոստացել է պարզ և անկեղծ զրույց ունենալ Հայաստանի Հանրապետության քաղաքացիների հետ, իսկ դրա ժամանակը, նրա խոսքով, մոտենում է:
