Վաղ կենսաթոշակի ներդրումից հետո տեսնենք, թե քանի դատավոր հրաժարական կտա. Ռուստամ Բադասյան․ ՏԵՍԱՆՅՈՒԹ

Արդարադատության նախարար Ռուստամ Բադասյանը Վենետիկի հանձնաժողովի նախագահ Ջիանի Բուքիքիոնի հայտարարությունը ողջունում է։ Նա ԱԺ-ում լրագրողների հետ զրույցում նշեց, որ ինքն էլ համակարծիք է այն մասով, որ, ի վերջո, պետք է ստեղծված ճգնաժամը հանգուցալուծվի։

«Կարևոր է, Կառավարությունում էլ ի գիտություն ենք ընդունել իր դիտարկումները»,- ասաց նա։

Ինչ վերաբերում է Բուքիքիոնի հորդորին, որ սահմանադրական ինստիտուները հարգեն իրար, արդյո՞ք դրա անհրաժեշտությունն ինքը տեսնում է, Բադասյանը պատասխանեց․ «Փոխադարձ հարգանի անհրաժեշտություն միշտ եմ տեսնում, սակայն ՍԴ-ի շուրջ ստեղծված իրավիճակը փոխադարձ հարգանքի խնդիր չէ, այլ ՍԴ նախագահի ընտրության կասկածելի հանգամանքներ են, որոնք ոչ թե ծագել են այսօր, այլ այն ժամանակ, երբ ինքն ընտրվել է»։

Բադասյանի կարծիքով՝ Վենետիկի հանձնաժողովի նախագահի հայտարարությունն ուղղված է բոլոր սահմանադրական մարմիններին։

«Եթե ճնշումների հետ կապված կասկած կա, մենք կարող ենք տրամադրել հավելյալ փաստեր, որ այդ կասկածները փարատվեն»,- նշեց Բադասյանը։

Նախարարի գնահատմամբ՝ Սահմանադրության ոգուն դեմ են այն գործընթացները, որոնցով Հրայր Թովմասյանը դարձել է ՍԴ նախագահ։ Ըստ Ռուստամ Բադասյանի՝ ՍԴ-ն կբարեփոխվի, ճգնաժամն ամբողջությամբ կլուծվի այն ժամանակ, երբ կլինեն սահմանադրական բարեփոխումներ։

Հարցին՝ այս փուլում Հրայր Թովմասյանի հրաժարականը ճգնաժամին լուծում կտա՞, պատասխանեց․ «Դժվարանում եմ պատասխանել, բայց վաղ կենսաթոշակի ներդրումից հետո տեսնենք, թե քանի դատավոր հրաժարական կտա։ Մեծապես կարևորում եմ ՍԴ-ի կազմի թարմացումը»։

Մանրամասները՝ տեսանյութում։