27.09.2026 | 10:55
Լոռու, Արմավիրի և Կոտայքի 4 համայնքներում ՏԻՄ ընտրություններ են․ ժամը 08։00-ին բացվել են բոլոր 14 տեղամասերը․ ԿԸՀ
Սա արդարության հաղթանակ է. Թանկյանը շնորհակալություն է հայտնել Հայոց ցեղասպանությունը ճանաչող բանաձեւի ընդունման համար
Քաղաքականություն
30.10.2019 | 13:12
Աշխարհահռչակ երաժիշտ, System of a Down խմբի մենակատար Սերժ Թանկյանը շնորհակալություն է հայտնել ԱՄՆ Կոնգրեսի ներկայացուցիչների պալատին Հայոց ցեղասպանությունը դատապարտող բանաձեւ ընդունելու համար: Երգիչն այդ մասին գրառում է կատարել սոցցանցերում: Մասնավորապես Թվիթերում նա ընդգծել է, որ սա արդարության հաղթանակն է:
«Սա ճշմարտության ու արդարության հիանալի հաղթանակ էր: Հիմա հերթը Սենատինն է»,- գրել է նա:
Ինստագրամում Թանկյանը նշել է, որ Ներկայացուցիչների պալատը լուրջ քայլ է կատարել դեպի արդարությունը: Ընդգծել է, որ, ճիշտ է, սա չի վերականգնի հայրենիքի ու կյանքերի այն կորուստը, որը հայերն ունեցել են, սակայն սա հարգանքի տուրք է մեր տատիկ-պապիկների եւ այն ամենի նկատմամբ, ինչի միջով նրանք անցել են: Ֆեյսբուքում Թանկյանը շնորհակալություն է հայտնել բանաձեւի ընդունման համար եւ խոսել Թուրքիայի նկատմամբ պատժամիջոցներ կիրառելու մասին:
«Շատ կարեւոր է, որ Թուրքիայի նկատմամբ տնտեսական պատժամիջոցներ կիրառվեն՝ անօրինական կերպով Սիրիա ներխուժելու համար»,- գրել է նա՝ նույնպես ավելացնելով, որ ցեղասպանության մասին դիրքորոշում հայտնելու հերթը Սենատինն է:
ԱՄՆ ներկայացուցիչների պալատը բանաձեւն ընդունել է հոկտեմբերի 29-ին: Ընդունվել է 405 կողմ, 11 դեմ ձայների հարաբերակցությամբ: Կողմ է քվեարկել 226 դեմոկրատ եւ 178 հանրապետական կոնգրեսական:
