30.04.2026 | 13:29
Իսլամ Մախաչևը սկսել է պատրաստվել հաջորդ մենամարտին
Հայաստանում ռուսական 102-րդ ռազմաբազայի ռազմական ներուժը գրեթե կրկնակի կմեծանա
Քաղաքականություն
29.10.2019 | 17:34
Հայաստանի տարածքում տեղակայված ռուսական 102-րդ ռազմաբազայի ռազմական ներուժը գրեթե կրկնակի կմեծանա սպառազինության և ռազմական տեխնիկայի նոր ու արդիականացված նմուշներով զինելուց հետո: ՌԴ պաշտպանության նախարար Սերգեյ Շոյգուին այսպիսի տվյալներ է զեկուցել 102-րդ բազայի հրամանատար, գնդապետ Նիկոլայ Մարտինյուկը. երեքշաբթի Շոյգուն տեսչական ստուգում է անցկացրել Գյումրիում տեղակայված ռուսական բազայում, հայտնում է «Ինտերֆաքսը»:
Հարավային ռազմական օկրուգի շտաբի պետ, գեներալ-լեյտենանտ Սերգեյ Կուզովլևն իր հերթին ՌԴ պաշտպանության նախարարին զեկուցել է, որ «բազան ամբողջ ծավալով ապահովված է նյութական միջոցներով, տեխնիկայով ու սպառազինությամբ»:
Նա նաև նշել է, որ բազայի հրաձգարանի ենթակառուցվածքը թույլ է տալիս անցկացնել մարտական պատրաստականության բոլոր տեսակների միջոցառումների, այդ թվում զորավարժությունների ամբողջական ցիկլ:
Երեքշաբթի ավելի վաղ պաշտպանության փոխնախարար Թիմուր Իվանովը Շոյգուին զեկուցել էր, որ 2020 թվականին Հայաստանում ռուսական ռազմաբազայի տարածքում ստեղծվելու է բազմագործառնական մշակութաժամանցային կենտրոն: 2021 թվականին այնտեղ կկառուցեն նաև միասնական մարզական համալիր:
Ռուսական 102-րդ ռազմաբազան երկու կայազոր ունի՝ Գյումրիում և Երևանում: Այն տեղակայվել է 1995 թվականին:
