Վատատեսական սցենար է, ոչինչ չանելու դեպքում կարելի էր այս ՀՆԱ-ն ապահովել. Թանդիլյանը՝ Ջանջուղազյանին. ՏԵՍԱՆՅՈՒԹ

Դուք բերում եք վատատեսական սցենար, որի պարագայում, անգամ ոչինչ չանելու դեպքում, այսքան ՀՆԱ-ի աճ հնարավոր էր լինում ապահովել․ այս մասին ԱԺ-ում 2020 թվականի բյուջեի նախագծի քննարկման ժամանակ ասաց ԱԺ «Լուսավոր Հայաստան» խմբակցության պատգամավոր Մանե Թանդիլյանը։

«Խոսեցիք ՀՆԱ-ի աճի մասին, որը Դուք անվանում եք 4․9 տոկոսը պահպանողական, բայց և այնպես, կարծում եմ, որ մենք պետք է նախատեսենք ՀՆԱ-ի ո՛չ պահպանողական, ո՛չ վատատեսական, ո՛չ լավատեսական, այլ իրատեսական աճ:  Իսկ այս պարագայում սա ոչ միայն պահպանողական է, այլև ցածր և չի արտացոլում նախորդ տարիների անցած ճանապարհը, նաև հեղափոխական տարում 5․2 տոկոս ՀՆԱ-ի աճը, հետագայում ավելի բարձր սպասվողը՝ 2019 թվականինը։ Հիմա դուք բերում եք վատատեսական սցենար, որի պարագայում, անգամ ոչինչ չանելու դեպքում, այսքան ՀՆԱ-ի աճ հնարավոր էր լինում ապահովել։ Հետևաբար ես ակնկալում եմ իրատեսական աճ, այլ ոչ թե՝ ցածր կամ բարձր»,- ասաց Մանե Թանդիլյանը։

Վերջինիս հետաքրքրում էր՝ արդյոք Հարկային օրենսգրքի փոփոխությունը, Կառավարության կողմից իրականացվող բարեփոխումները որևէ կերպ արտացոլված են 4․9 տոկոս ՀՆԱ-ի աճի մեջ։

«ՀՆԱ-ի կառուցվածքում որևէ փոփոխություն չունենք, այնինչ երկար տարիներ այս ընթացքում հնչեցված հայտարարությունների մակարդակով խոսում են, որ ՀՆԱ-ի կառուցվածքի փոփոխության անհրաժեշտություն կա, և այդ ուղղությամբ աշխատանքներ տարվում են, բայց այս կառուցվածքում աշխատանքները որևէ կերպ արտացոլված չեն․ նորից հանքերի, բուքմեյքերների վրա է մեր հույսը։ Գյուղատնտեսական ոլորտում այն, որ աճն ընդամենը 0․5 տոկոս է նախատեսվում, բայց 10 մլրդ-ի վարկի ծախս ենք նախատեսում, ցույց է տալիս, որ այս առումով որևէ ակնկալիք չունենք կատարած ծախսի արդյունքում՝ ՀՆԱ-ի աճի ազդեցության մասով»,- նկատեց Թանդիլյանը։

Հիշեցնենք, որ այսօր ԱԺ-ում քննարկվում է 2020 թվականի բյուջեի նախագիծը։

Մանրամասները՝ տեսանյութում։