Քաղաքականություն
27.10.2019 | 13:02Ապրիլյան պատերազմի հանգամանքներն ուսումնասիրող հանձնաժողովի հետ ՊՆ-ն սերտ համագործակցում է, բոլոր անհրաժեշտ փաստաթղթերը տրամադրվում են, ՊՆ ներկայացուցիչները ներկա են այդ աշխատանքներին: Այս մասին լրագրողների հետ զրույցում ասաց ՀՀ պաշտպանության նախարար Դավիթ Տոնոյանը: Նախարարը նաև նշեց, որ եթե ինքն էլ հրավիրվի, կներկայանա հանձնաժողով:
Հարցին՝ ի՞նչ ակնկալիքներ ունի այդ հանձնաժողովի աշխատանքներից, նա պատասխանեց. «Որպեսզի ավարտվեն ասեկոսեները հասարակության մեջ ապրիլյան գործողությունների հետ կապված: Ես բացառում եմ դավադիր պատերազմը, այսինքն՝ դավադիր գործողություններ հակառակորդի կողմից եղել են, բայց դավադրություն հայաստանյան կողմից բացառում եմ»:
Խոսելով սահմանում տիրող իրադրության մասին՝ Դավիթ Տոնոյանն ասաց, որ այս պահին այն վերահսկելի է, համեմատական անդորր է, կան կրակոցներ, որոնք հիմնականում կապված են տարվող ինժեներական աշխատանքների հետ:
Նախարարն անդրադարձավ նաև օրեր առաջ իր հրաժարականի վերաբերյալ մամուլում տարածված լուրերին՝ ասելով, որ, երևի, տրամադրություններ էին ստուգում, ապա ավելացրեց, որ ասեկոսեներով, սպեկուլյացիաներով զբաղվելու ժամանակ չունի: Նա նշեց, որ վարչապետի հետ իր հարաբերություններում լարվածություն չկա:
Լրագրողների հարցին՝ ինչ կասի Արցախի հարցի կարգավորման վերաբերյալ, նախարարը պատասխանեց, որ Արցախի հարցը լուծված է:
Մանրամասները՝ տեսանյութում:
Նարեկ Կիրակոսյան
