Գագիկ Ջհանգիրյանը Հոկտեմբերի 27-ի գործով պետք է հայտարարություն աներ, Քոչարյանը չթողեց. ժամանակն է, որ խոսի. Սասուն Միքայելյան․ ՏԵՍԱՆՅՈՒԹ

ԵԿՄ վարչության նախագահ, պատգամավոր Սասուն Միքայելյանն այսօր՝ Հոկտեմբերի 27-ի ոճրագործության 20-րդ տարալիցի օրը, Եռաբլուրում ուշագրավ հայտարարություն արեց: Նա ասաց՝ ամեն ինչ պետք է անել, որ գործը լիարժեք բացահայտվի և ժամանակն է, որպեսզի Գագիկ Ջհանգիրյանը խոսի:

«Ժամանակն է, որ նախկին զինդատախազ Գագիկ Ջհանգիրյանն ասի, թե ինչ է կատարվել, քանի որ 1999թ. հոկտեմբերի 27-ի ահաբեկչությունից հետո նա է Նաիրի Հունանյանի գործը քննել և ավելի շատ բան պետք է իմանա: Գումարած դրան՝ Ջհանգիրյանը եղել է Վազգեն Սարգսյանի մտերիմ ընկերներից մեկը: Եթե այդ ոճրագործությունը չբացահայտվեց, ոչ ոք չի կարող ասել, որ նման բան չի կրկնվի: Պարոն Ջահանգիրյանը պետք է հայտարարություն աներ, բայց Ռոբերտ Քոչարյանի ինչ-որ գրավոր հանձնարարությունից հետո նա չխոսեց: Հիմա ժամանակն է, որ խոսի»,- ասաց նա և հավելեց. «Ժամանակն է, որ ամեն մեկն իր բաժին մեղքը վերցնի, արտահայտվի»:

Անդրադառնալով Նաիրի Հունանյանի վաղաժամկետ ազատման դիմումին՝ նա հարցադրում արեց, թե «Նաիրի Հունանյանը դուրս գա՝ ի՞նչ անի»:

«Քանի դեռ հանրապետության երեք նախագահներն այս կամ այն կերպ քաղաքական դաշտում դերակատարություն ունեն, լավ բան չսպասենք մեր երկրում»,- ասաց նա։

Սասուն Միքայելյանը նաև անդրադարձավ ՀՀ երեք նախագահներին՝ Լևոն Տեր-Պետրոսյանին, Ռոբերտ Քոչարյանին և Սերժ Սարգսյանին, մատնանշելով նրանց կապը ոճրագործության հետ:

«Լևոն Տեր-Պետրոսյանը հրաժարականից հետո, երկար լռելուց հետո հայտարարեց, որ պետք է համախմբվենք նախագահի՝ Ռոբերտ Քոչարյանի շուրջ: Այն նախագահի, որի նախագահության օրոք ահաբեկչություն է տեղի ունեցել: Այսօր իշխանափոխություն է եղել, պետք է ոճրագործությունը բացահայտվի, եթե չբացահայտվեց, անիմաստ է»,- ասաց նա:

Մանրամասները՝ տեսանյութում:

Նարեկ Կիրակոսյան