Նաիրի Հունանյանը գիտի, որ կողքի խցում Ռոբերտ Քոչարյանն է, և կուզի առիթից օգտվել ու անուններ տալ. Արամ Սարգսյան․ ՏԵՍԱՆՅՈՒԹ

Նոր իշխանությունները որևէ կաշկանդվածություն չունեն Հոկտեմբերի 27-ը բացահայտելու առումով, սակայն այս փուլում գործի վերաբացումը կրկին վստահություն չի ներշնչելու, քանի որ նման գործի համար հարկավոր է ունենալ արդար դատական համակարգ: Այս մասին լրագրողների հետ զրույցում ասաց Հոկտեմբերի 27-ի ահաբեկչության 20-րդ տարելիցի կապակցությամբ «Եռաբլուր» զինվորական պանթեոն այցելած «Հանրապետություն» կուսակցության նախագահ Արամ Սարգսյանը:

«Միանշանակ է, որ իշխանությունները շահագրգռված են գործի բացահայտմամբ: Գործն իսկապես քաղաքական ենթատեքստ ունի։ Մեկ անգամ արդեն քաղաքական դատավարություն եղել է, և տարբեր մարդիկ տարբեր նպատակներով դատավարությունն արագ անցկացրել են, և դրա արդյունքները չեն բավարարել որևէ մեկին»,- ասաց նա:

Արամ Սարգսյանը նշեց, որ հիմա գլխավոր հանցագործը հետևում է գործընթացներին և ենթադրություններ է անում: «Ամենայն հավանականությամբ, նման հանցագործության գնացած ստահակն ամեն ինչի ընդունակ է, և ես չեմ բացառում, որ հիմա ինքը, իմանալով, որ իր կողքի խցում է նստած Ռոբերտ Քոչարյանը, փորձի օգտվել դրանից և որոշակի բաներ ասի, ինչը կարող է և ճշմարտություն է, գուցե ասվում է նրա համար, որ հայտնվի շահեկան իրավիճակում»,- ասաց նա:

Սարգսյանի կարծիքով՝ Հոկտեմբերի 27-ի նման բարդ դատավարությունները պետք է տեղի ունենան այնպիսի ժամանակահատվածում, երբ ամբողջությամբ դատաիրավական համակարգը ձևավորված կլինի, կունենա հանրային լուրջ վստահություն, երբ պետությունն իսկապես ուժեղացած կլինի:

«Երբ ուժեղ պետություն կլինենք, այդ ժամանակ կարող ենք ստուգել արտաքին քաղաքական վարկածը, չեմ կարծում՝ այսօրվա Հայաստանի Հանրապետությունը դա կարող է ստուգել, այն պարագայում, երբ Ռուսաստանի նախագահը գալիս է Հայաստան և ուզում է հանդիպել Ռոբերտ Քոչարյանին: Ես գտնում եմ, որ այս փուլում գործի վերաբացումը, գործի վերաբացմամբ դատավարության անցկացումը նույնչափ վստահություն չի ներշնչելու, ինչ նախկինում։ Ես ուզում եմ միայն արդար դատական համակարգ ունենալու պարագայում գործը բացահայտվի»,- ասաց նա։

Այդուհանդերձ, նա նշեց, որ չնայած դրան՝ քաղաքական կամքի առկայությունը, իհարկե, վստահություն ներշնչում է. «Կա դատական համակարգ և գործող իշխանություն հակադրություն, որն առ այսօր չի լուծվել»:

Մանրամասները՝ տեսանյութում:

Նարեկ Կիրակոսյան