09.12.2025 | 16:52
Հայաստանի առաջնության ամենաթանկ ֆուտբոլիստները՝ ըստ Transfermarkt-ի
Գավառում հիմնանորոգվում է բազմաբնակարան շենքի տանիքը, մանկապարտեզի տանիքն ու պատուհանները. ՄԻՊ-ն ու մարզպետը հանդիպել են քաղաքացիների հետ
Հասարակություն
25.10.2019 | 19:09
Մարդու իրավունքների պաշտպանի աշխատակազմից տեղեկացնում են, որ ՄԻՊ Արման Թաթոյանն ու Գեղարքունիքի մարզպետ Գնել Սանոսյանը հանդիպել են Գավառ քաղաքի բնակիչների հետ, որոնց խնդիրները համագործակցության արդյունքում լուծում են ստանում:
«Մասնավորապես, հիմնանորոգվում է քամու հետևանքով վնասված Գավառ քաղաքի Կաբելագործների փողոցի թիվ 9 բազմաբնակարան շենքի տանիքը:
Մարդու իրավունքների պաշտպան Արման Թաթոյանը բնակիչների հետ զրույցում նշել է, որ իրականացվող աշխատանքները համագործակցության հաջողված օրինակ են: Քաղաքացիներից դիմում ստանալուց հետո Մարդու իրավունքների պաշտպանը և Գեղարքունիքի մարզպետը աշխատել են խնդիրը լուծելու ուղղությամբ:
Գեղարքունիքի մարզպետը տեղեկացրել է, որ Գավառ քաղաքի Կաբելագործների փողոցի թիվ 9 բազմաբնակարան շենքի տանիքի շինարարական աշխատանքների մեկնարկի ժամկետը պայմանավորված է այն հանգամանքով, որ Կառավարության որոշումից մինչև շինարարության սկսվելը հարցն անցնում է որոշակի ընթացակարգերով, որոնք ժամանակ են պահանջում:
Մարդու իրավունքների պաշտպանն այցելել է նաև Գավառի թիվ 6 մանկապարտեզի տարածք, հանդիպել մանկապարտեզի վերաբացման համար Պաշտպանի աշխատակազմ դիմած քաղաքացիների հետ:
Մարզպետը տեղեկացրել է, որ մանկապարտեզի հիմնանորոգման աշխատանքների առաջին փուլն իրականացվել է ՀՀ կառավարության կողմից հաստատված հրատապ խնդիրների կարգավորման ծրագրով: Հատկացված միջոցներով երեք մասնաշենքերի վրա կառուցվել է նոր տանիք, մեկ մասնաշենքում ամբողջությամբ, իսկ մեկ մասնաշենքում մասնակիորեն տեղադրվել են նոր պատուհաններ:
Պայմանավորվածություն է ձեռք բերվել մանկապարտեզը հնարավորինս արագ շահագործելու համար համատեղ աշխատանք իրականացնել»,- ասված է հաղորդագրությունում:
