«ԵՄ երկրները նեգատիվ տրամադրված չեն, բայց պատրաստ չեն տալ ազատ վիզաների կանաչ լույսը». ԱԳ փոխնախարար. ՏԵՍԱՆՅՈՒԹ

Եվրամիության հետ հարաբերությունները ՀՀ արտաքին օրակարգի ամենակարևոր առաջնահերթություններից են: ԵՄ-ն մեր կարևորագույն ու հիմնական քաղաքական, տնտեսական, առևտրային և ներդրումային գործընկերներից է: Այս մասին այսօր՝ վիզաների ազատականացման թեմայով միջազգային գիտաժողովի ընթացքում նշեց  ՀՀ արտաքին գործերի նախարարի տեղակալ Ավետ Ադոնցը:

«Վիզային ռեժիմի ազատականացումը մեր այսօրվա օրակարգի կարևորագույն կետերից մեկն է: Այն Եվրամիություն-Հայաստան համաձայնագրով ամրագրված համատեղ պարտավորություն է»,- ասաց Ավետ Ադոնցը:

Փոխնախարարն անդրադարձավ վերջին շրջանում Հայաստանում ԵՄ անդամ մի քանի երկրների դեսպանատների հասցեին հնչող բողոքներին. «ԱԳՆ-ն և Հյուպատոսական ծառայությունն անմիջապես փորձում են լուծել այդ խնդիրները և բացառել հետագայում նմանատիպ դեպքերի հնարավորությունը»:

Ըստ ԱԳ փոխնախարարի՝ վիզաների ազատականացման հարցում ԵՄ երկրները նեգատիվ տրամադրված չեն, բայց պատրաստ էլ չեն կանաչ լույս տալ: «Մեր գերատեսչական փորձագիտական խումբը, որի կազմում են ԱԳՆ-ի, Ոստիկանության ու Միգրացիոն ծառայության ներկայացուցիչներ, պարբերաբար հանդիպում են ԵՄ անդամ երկրների գործընկերների հետ և տեղում քննարկում այն դժվար հարցերը, որոնք թույլ չեն տալիս այս կամ այն երկրին դրական արձագանք ստանալ վիզաների ազատականացման գործընթացը սկսելու համար: Երեկ Փարիզում, հերթական հանդիպումն էր: Դրանից առաջ քննարկումներ ենք ունեցել Ֆինլանդիայում, Շվեդիայում, Ավստրիայում ու Գերմանիայում»,- նշեց ԱԳ փոխնախարարը: Նրա խոսքով՝ վիզային ռեժիմի ազատականացման գործընթացի բարդությունները կախված են ոչ այնքան Հայաստան-ԵՄ երկկողմ հարաբերություններից, որքան համաեվրոպական միգրացիոն խնդիրներից:

Մանրամասները՝ տեսանյութում:

Նելլի Մելքոնյան