06.04.2026 | 18:48
Էրիթրեայի հավաքականի 7 ֆուտբոլիստներ անհետացել են Հարավային Աֆրիկայում խաղից հետո
Նոյեմբերին Լավրովի՝ Երևան այցի ընթացքում ՀՀ-ում գործող բիոլաբորատորիա ռուս մասնագետների մուտքն ապահովող հուշագիր կստորագրվի. «Կոմերսանտ»
Քաղաքականություն
25.10.2019 | 13:58
Ռուսաստանցի մասնագետների, այդ թվում՝ զինվորականների համար կերաշխավորվի Հայաստանում ամերիկյան Պենտագոնի միջոցներով ստեղծված կենսաբանական լաբորատորիաներ մուտքը: «Կոմերսանտ»-ին հայտնի է դարձել, որ համապատասխան հուշագիրը ծրագրվում է ստորագրել ՌԴ ԱԳ նախարար Սերգեյ Լավրովի՝ Երևան այցի ընթացքում:
«Կոմերսանտը» գրում է, որ բանակցությունների ընթացքից տեղյակ ռուսական և հայկական աղբյուրները հայտնել են, թե հուշագրի ուղղությամբ աշխատանքներն ավարտվել են, և այն կստորագրվի Սերգեյ Լավրովի՝ նոյեմբերի 10-11-ը նախանշված երևանյան այցի ընթացքում: Մեկ այլ աղբյուր էլ հաստատել է, որ փաստաթղթի տեքստն արդեն պատրաստ է և գտնվում է միջգերատեսչական համաձայնեցման փուլում:
Պարբերականի աղբյուրների համաձայն՝ հուշագիրը ենթադրում է բժշկա-կենսաբանության ոլորտում երկու երկրների համագործակցություն: Ընդ որում, Հայաստանում գործող կենսաբանական լաբորատորիաներ այցելելու թույլտվություն կունենան նաև ինչպես ՌԴ Առողջապահության, այնպես էլ Պաշտպանության նախարարության մասնագետները:
ԱՄՆ-ի միջոցներով արդիականացված լաբորատորիաներ, որտեղ կենսաբանական հետազոտություններ են անցկացվում, ուսումնասիրվում են վիրուսներ և շտամեր, գործում են Ուկրաինայում, Վրաստանում, Ղազախստանում և Հայաստանում: Հրապարակման համաձայն՝ Ռուսաստանը բազմիցս է ԱՄՆ-ին քննադատել ռուսական սահմանների մոտ «ռազմական բժշկա-կենսաբանական ակտիվության համար» և խոստացել է հասնել նրան, որ հարևան երկրներում գործող այդ լաբորատորիաների գործունեությունը բաց լինի Մոսկվայի համար:
Հրապարակման և Սերգեյ Լավրովի այցի շուրջ Factor.am-ը փորձեց պատասխան ստանալ Հայաստանի ԱԳ նախարարությունից:
«Ներկայումս այցի կազմակերպման շուրջ աշխատանքներ տարվում են: Հայ-ռուսական իրավապայմանագրային դաշտի ընդլայման շուրջ աշխատանքները կրում են շարունակական բնույթ։ Ինչ վերաբերում է կոնկրետ փաստաթղթի ստորագրմանը և դրա բովանդակությանը, ապա նախքան փաստաթղթերի ստորագրումը, դրանց բովանդակության վերաբերյալ որևէ մեկնաբանություն չենք կարող անել»,- նշեց ՀՀ ԱԳՆ խոսնակ Աննա Նաղդալյանը:
