ՀՔԾ-ի կողմից Արա Բաբլոյանի ցուցմունքից մաս հրապարակելը պաշտպանի համար անհասկանալի է․ ՀՔԾ-ն պարզաբանում է

Հատուկ քննչական ծառայությունն այսօր պարզաբանում էր տարածել, թե ինչ է նկատի ունեցել ԱԺ նախկին նախագահ Արա Բաբլոյանը, ասելով, թե իրեն մի բանում կարող են մեղադրել՝ որ նպաստել է Նիկոլ Փաշինյանի իշխանության գալուն։

ՀՔԾ-ի հաղորդագրությունում ասված է․ – «Հաշվի առնելով այս հայտարարության ուղղությամբ քննություն սկսելու հետ կապված լրատվամիջոցների կողմից վարույթն իրականացնող մարմնին ուղղված բազմաթիվ հարցադրումներն ու հանրության հետաքրքրությունը հիշյալ հարցի շուրջ` հարկ ենք համարում հայտնել, որ Արա Բաբլոյանն այս հայտարարության կապակցությամբ քննիչի կողմից իրեն ուղղված հարցադրմանը բառացի պատասխանել է հետևյալը. «Ճիշտն ասած, ի նկատի եմ ունեցել այն, որ ներկայիս ՀՀ վարչապետ Նիկոլ Փաշինյանը ևս ԱԺ պատգամավորի պաշտոնից է նշանակվել վարչապետի պաշտոնում և պատգամավորական մանդատից հրաժարական չի ներկայացրել: Եթե ենթադրենք՝ Հրայր Թովմասյանի դեպքում խախտում էի թույլ տվել այն մասով, որ նա պատգամավորական մանդատից հրաժարական չէր ներկայացրել, սակայն արձանագրել էի նրա պատգամավորի լիազորությունները վաղաժամ դադարած լինելու հանգամանքը, ապա նույն խախտումը ենթադրաբար թույլ էի տվել նաև Նիկոլ Փաշինյանի դեպքում: Սակայն փաստաբանիս հետ իրավաբանական խորհրդակցությունից հետո հասկացա, որ նման պայմաններում պետական մարմնում պաշտոնի նշանակվելուց հետո պատգամավորի լիազորությունները, ՀՀ Սահմանադրության 2015 փոփոխությունների 95-րդ հոդվածի համաձայն, ինքնաբերաբար, իրավունքի ուժով դադարում են: Իմ կողմից տրված հարցազրույցի մասով ավելացնելու այլ բան չունեմ»:

Արա Բաբլոյանի պաշտպան Արամ Վարդևանյանը Factor.am-ի հետ զրույցում ասաց՝ մտահոգված է, որ իրենց և մնացածի համար նախաքննական գաղտնիքի հետ կապված խիստ մոտեցումներ է որդեգրում ՀՔԾ-ն, բայց երբ հերթը հասնում է իրենց, կարող են անձի ցուցմունքից ուղղակի մեջբերումներ անել:

«Հասկանալի չէ՝ ինչո՞ւմն էր անհրաժեշտությունը ուղղակի մեջբերումներով ցուցմունքից հատված հրապարակելու»,- ասաց նա։

ՀՔԾ-ից էլ Factor.am-ին փոխանցեցին, որ քննիչն է որոշում՝ հրապարակվող նախաքննական տվյալների ծավալն ու նպատակահարմարությունը։

Լիլիթ Շաբոյան