Արա Բաբլոյանը ՀՔԾ-ում է, քիչ անց հարցաքննության կժամանի նաև Գագիկ Հարությունյանը

Այս պահին Ազգային ժողովի նախկին նախագահ Արա Բաբլոյանը հարցաքննվում է Հատուկ քննչական ծառայությունում: Մինչև 18:00-ն հարցաքննության է հրավիրված նաև ՍԴ նախկին նախագահ Գագիկ Հարությունյանը: Տեղեկությունը Factor.am-ին փոխանցեցին ՀՔԾ-ի մեր աղբյուրները:

ՀՔԾ խոսնակ Մարինա Օհանջանյանն իր հերթին Factor.am-ի հարցին ի պատասխան ասաց, որ այս տեղեկությունները չեն մեկնաբանում:

Հիշեցնենք, որ ԱԺ պատգամավոր Արման Բաբաջանյանի հաղորդման հիման վրա Հատուկ քննչական ծառայությունն իշխանության յուրացման փաստի առթիվ քրեական գործ է հարուցել, որի շրջանակում իշխանության յուրացմանն օժանդակելու և պաշտոնական կեղծիք կատարելու համար կալանավորվեց ԱԺ աշխատակազմի ղեկավարի նախկին տեղակալ Արսեն Բաբայանը:

ԱԺ նախկին նախագահն այս գործով ունի կասկածյալի կարգավիճակ, իսկ Գագիկ Հարությունյանի կարգավիճակը հայտնի չէ:

Ըստ մեղադրանքի՝ Բաբայանը խեղաթյուրել է Գագիկ Հարությունյանի դիմումն ԱԺ մուտքագրելու ժամկետը. իրականում այն մուտքագրվել է 2018 թվականի մարտի 5-ին, մինչդեռ մուտքագրման ամսաթիվ է նշվել 2018 թվականի մարտի 2-ը։ Այս եղանակով Արսեն Բաբայանը պայմաններ՝ կեղծ հիմքեր է ստեղծել Սահմանադրական դատարանի լիազորություններին տիրանալու նպատակով ԱԺ նախագահ Արա Բաբլոյանի՝ 2018 թվականի մարտի 2-ին ստորագրած ՍԴ նախագահ Գագիկ Հարությունյանի կողմից հրաժարականի դիմում ներկայացնելու մասին հայտարարությունը հրապարակելու համար, ինչն էլ իր հերթին հիմք է հանդիսացել վերջինիս լիազորությունները դադարեցնելու, իսկ հետագայում՝ այդ թափուր պաշտոնում Հրայր Թովմասյանին առաջադրելու ու նշանակելու գործընթացի համար:

Նարեկ Կիրակոսյան