Ինչ ուզում եք արեք, արեք դա օրենքի սահմաններում․ ԱԺ-ն՝ Արա Բաբլոյանի և մյուսների դեմ մեղադրանքի մասին. ՏԵՍԱՆՅՈՒԹ

Արսեն Բաբայանի և Արա Բաբլոյանի մասնակցությամբ հարուցված քրեական գործն ի՞նչ զարգացումներ կունենա խորհրդարանում Սահմանադրական դատարանի նախագահ Հրայր Թովմասյանի լիազորությունների դադարեցման գործընթացի վրա:

«Մի քանի տարբերակներ քննարկվում են»,- ասում է ԱԺ «Իմ քայլը» խմբակցության անդամ Արեն Մկրտչյանը։

Իշխանական պատգամավորը տարօրինակ է համարում վերջին օրերին հարուցված քրեական գործերում քաղաքական հետապնդում փնտրելը՝ Արսեն Բաբայանին առաջադրված է կոնկրետ մեղադրանք, իսկ Արա Բաբլոյանը կասկածվում է կոնկրետ ենթադրյալ հանցանքում:

«Քաղաքական հետապնդումն այն էր, երբ մենք, մեր ընտանիքի անդամները տարիներ ի վեր մեր հասարակական-քաղաքական գործունեության պատճառով ենթարկվել ենք ճնշումների, երբ մեր ընտանիքի անդամների հետևից սև մեքենաներ են շրջել, երբ գաղտնալսվել ենք, երբ փողոցային պրոցեսների ժամանակ տարբեր պրոցեսների արդյունքում մեր ծնողները հայտնվել են տարբեր իրավական կառույցներում»,-հիշեցնում է իշխանական պատգամավորը։

Ընդդիմադիր պատգամավոր Նաիրա Զոհրաբյանը դժվարանում է ասել, թե Հրայր Թովմասյանի գործում ի հայտ եկած նոր հանգամանքները ինչպես կանդրադառնան նրա լիազորությունները դադարեցնելու՝ Ազգային Ժողովի կողմից նոր գործընթաց նախաձեռնելու վրա: «Ինձ համար հասկանալի չեն նաև «Իմ քայլի» պատգամավորների այն հայտարարությունները, որ Հրայր Թովմասյանի հարցը քաղաքական հարց է։ Էն պահին, որ մենք ընդունեցինք, որ իրավապահ համակարգի հարցը քաղաքական հարց է և փորձեցինք դրան գտնել քաղաքական լուծումներ, էդ պահից համարեք, որ քաղաքական ուղղակի պրեսինգի տակ է իրավական համակարգը»,- զգուշացնում է ԱԺ «Բարգավաճ Հայաստան» խմբակցության անդամ Նաիրա Զոհրաբյանը։

Նրան չեն բավարարում Հատուկ քննչական ծառայության հիմնավորումները, թե ինչու են նրանք կալանավորել Ազգային Ժողովի աշխատակազմի ղեկավարի նախկին տեղակալին և կասկածյալի կարգավիճակ տվել Ազգային ժողովի նախկին նախագահ Արա Բաբլոյանին:

«Արսեն Բաբայան կլինի, Արա Բաբլոյան կլինի, ինձ համար անձը էստեղ որևէ նշանակություն չունի, ինձ համար կարևոր է, որ բոլոր գործընթացները լինեն բացառապես իրավական դաշտում և փորձ չարվի ոտքը դուրս հանել իրավական հարթությունից»,- կրկին զգուշացնում է տիկին Զոհրաբյանը։

Մեկ այլ ընդդիմադիր պատգամավոր Տարոն Սիմոնյանը չի ուզում հավատալ, որ Արա Բաբլոյանի և Արսեն Բաբայանի նկատմամբ իրականացվում է քաղաքական հետապնդում։ Առայժմ նա խոսում է քաղաքական նպատակահարմարությունից։

«Քաղաքական նպատակահարմարությունից ելնելով քրեական գործերի հարուցումը կամ չհարուցումը եղել է և, ցավոք սրտի, դեռ կա, դա եղել է նախորդ իշխանությունների ժամանակ, և ու էդ միտումը հիմա էլ, ոնց որ թե, շարունակում են։ Բայց քաղաքական նպատակահարմարություններ դեռ չի նշանակում, որ քաղաքական հետապնդում կա, թե չկա, առաջին զգուշավորության մակարդակը հիմա տեսնում եմ, որ էդ նպատակահարմարությունը կա և ոչ միայն էս գործում։ Ընդհանրապես էն դատավորների հետ կապված գործերով էլ, որ մի դեպքում մի դատավորի նկատմամբ բռնության կոչը կամ փաստացի կիրառումը հիմք հանդիսացավ քրեական գործի հարուցման, մեկ այլ դատավորի նկատմամբ նման գործողությունները հիմք չհանդիսացան․ սա ես գնահատում եմ որպես քաղաքական նպատակահարմարությամբ պայմանավորված քրեական գործերի հարուցում»,- պարզաբանում է ԱԺ «Լուսավոր Հայաստան» խմբակցության անդամ Տարոն Սիմոնյանը։

Նրա պատկերացմամբ իշխանությունը չի էլ թաքցնում, որ ամեն գնով ուզում է հասնել Հրայր Թովմասյանի հրաժարականին։ Ընդդիմադիր պատգամավորը դեմ չէ․ «Մենք ասում ենք՝ ինչ ուզում եք արեք, արեք դա օրենքի սահմաններում։ Եթե օրենքից դուրս գաք մենք անպայմանորեն կարձագանքենք և կդատապարտենք»։

Ըստ ընդդիմադիր պատգամավորի, այս պահի դրությամբ իշխանությունը որևէ հիմք չունի խորհրդարանում նախաձեռնել Հրայր Թովմասյանի պաշտոնանկության գործընթաց։ Իմքայլական Սուրեն Գրիգորյանը տեղեկացնում է, որ խորհրդարանն առայժմ մտադիր էլ չէ որևէ գործընթաց սկսել։

«Հրայր Թովմասյանի լիազորությունների դադարեցման էական կարգապահական հիմքով դիմելուց սկսած էդ վարույթն ավարտվել է ՍԴ-ի, ըստ իս, շատ անհիմն և Սահմանադրությանը հակասող որոշմամբ, և էդ որոշմամբ էդ պրոցեսը դադարել է»,- թեման փակում է ԱԺ «Իմ քայլը» խմբակցության անդամ Սուրեն Գրիգորյանը։

Ի դեպ, նա տեղեկացրեց, որ իշխանական խմբակցությունը քննարկում է Վահե Գրիգորյանի առաջարկը, որով նախատեսվում է առանց Սահմանադրական դատարանի անդամների հրաժարականին հասնելու, խորհրդարանում առաջադրել դատարանի դատավորների թեկնածուներ, ընտրել նրանց ու հարցը փակել։

Մհեր Արշակյան