04.08.2026 | 18:35
Ինչպես ներդնել ավելի հեշտ ու պարբերաբար․ Ամերիաբանկը ներկայացրել է MyInvest-ի նոր հնարավորությունը
Թուրքիան դեռ լիովին չի հասել իր նպատակներին, չեմ կարծում՝ հրադադարը երկար տևի. քրդագետ
Քաղաքականություն
23.10.2019 | 19:42
Չեմ կարծում, որ Սիրիայում հրադադարը երկարատև բնույթ կկրի, որովհետև Թուրքիան դեռ լիովին չի հասել իր առջև դրված նպատակներին: Այսօր լրագրողների հետ հանդիպմանն այս մասին ասել է քրդագետ, միջազգայնագետ Վահրամ Պետրոսյանը՝ անդրադառնալով Թուրքիայի կողմից Սիրիայի հյուսիսում ռազմական գործողությունների դադարեցմանը:
«Ըստ էության, հստակեցվեց մեկ իրողություն, որ թուրքական կողմին հնարավորություն տրվեց կատարել մի շարք մեծ և տարածաշրջանային տերությունների նպատակները: Իրականություն դարձնել այն, ինչին նրանք նույնպես ձգտում էին»,- ասաց փորձագետը:
Նրա խոսքով՝ մասնավորապես, ԱՄՆ-ն, որը քրդական ուժերի հետ դաշինքի մեջ էր ընդդեմ «Իսլամական պետություն» խմբավորման, չէր կարող բացահայտ մասնակցություն ունենալ ռազմական գործողություններում: Բացի այդ՝ այս իրադարձությունների արդյունքում շահեց նաև Ռուսաստանը:
«Մի կողմից՝ ԱՄՆ-ին իմիջային հարված հասցվեց, նշվեց, որ Վաշիգտոնը լքել է քրդերին: Միաժամանակ, կարևորվեց Մոսկվայի դերը: Իսկ, ընդհանուր առմամբ, տուժողը գերազանցապես քրդական կողմն է»,- ասաց Վահրամ Պետրոսյանը:
Ըստ նրա՝ քրդական ուժերն արդեն նշել են, որ պարզապես սպասում են, որպեսզի «այս իրադարձությունների շուրջ փոշին և ամպը վերանան, որպեսզի իրենց հետագա քայլերը հասկանան»:
