Հրայր Թովմասյանին օրենքով պաշտոնից հեռացնելը չափազանց դժվար է. քաղաքագետ

Հասկանալի է, որ քաղաքական բաղադրիչ կա Հրայր Թովմասյանի շուրջ ծավալվող իրադարձություններում, և այն, մեղմ ասած, շատ զգալի է: Այսօր լրագրողների հետ հանդիպմանն ասաց քաղաքագետ Ալեքսանդր Իսկանդարյանը:

Քաղաքագետը հակված չէ խոսել խնդրի իրավական կողմի մասին, ասում է՝ դրա մասնագետը չէ: Ինչ վերաբերում է քաղաքական բաղադրիչին, ըստ Իսկանդարյանի, այն ավելի քան հստակ է:

«Պատկերացնել, որ սա զուտ պատահականություն է, որ եթե չլիներ հեղափոխություն, եթե իշխանության չգար Նիկոլ Փաշինյանը, եթե չփոխվեր խորհրդարանը, և հիմա պարոն Թովմասյանի դեմ գործ լիներ այն բանի համար, որ նրա հայրը տան տանիքը սխալ է կառուցել, դե՝ կարիք չկա: Հասկանալի է, որ կա քաղաքական բաղադրիչ»,- հավելեց նա:

Ըստ քաղաքագետի՝ Հայաստանում տեղի է ունեցել հեղափոխություն՝ էլիտաների հերթափոխ. նոր էլիտան եկել է հնի փոխարեն, և հիմա նոր մարդիկ դուրս են մղում հներին, բայց դա իշխանափոխության տրամաբանությունն է: Նա, սակայն, հավելեց, որ մեր երկրում իշխանափոխությունը տեղի է ունենում օրինական մեթոդներով. «Օրենքի տառին պետք է հետևել, և այդ դեպքում հարկավոր է ամեն ինչ անելու օրինական ճանապարհը գտնել: Իսկ Սահմանադրական դատարանի դեպքում, ինչպես ես եմ հասկանում, օրինական միջոց գտնելը չափազանց բարդ է: Հարկավոր է այնպես անել, որպեսզի պարոն Թովմասյանն ինքը համաձայնի հեռանալ: Նրան օրենքով պաշտոնից հեռացնել չափազանց դժվար է, և դա ձգձգվում է»:

Ալեքսանդր Իսկանդարյանը կարծում է, որ եթե հիմա հնարավորություն լիներ մատի մեկ հարվածով մարդկանց դուրս բերել փողոցներ, ինչպես անցյալ տարվա ապրիլին, բոլորովին այլ իրավիճակ կլիներ, բայց այդ հնարավորությունն այլևս չկա:

«Լայն աջակցությունը շատ լավ բան է ցանկացած իշխանության համար, եթե դա ինչ-որ բանի համար օգտագործում ես: Իսկ եթե այն օգտագործում ես զուտ աջակցության համար, այն վաղ թե ուշ սկսում է նվազել»,- նշեց քաղաքագետը: