Արսեն Բաբայանին ձերբակալելը իրավապաշտպանի պնդմամբ՝ քաղաքական է, պատգամավորների խոսքով՝ ոչ. ՏԵՍԱՆՅՈՒԹ

Հատուկ քննչական ծառայությունը երեկ հայտնեց, որ պաշտոնական կեղծիք կատարելու կասկածանքով ձերբակալվել է Ազգային ժողովի աշխատակազմի ղեկավարի նախկին տեղակալը։ Խոսքը Արսեն Բաբայանի մասին է։ Նրա պաշտպանները ձերբակալման որոշումը բողոքարկել են՝ համարելով, որ այն ոչ իրավաչափ է։

«Յուրաքանչյուր նոր քայլ Հրայր Թովմասյանի նկատմամբ, կամ ինչպես մեր ընկերներից մեկն է ասում, «Կոլցո» օպերացիան շարունակելուն ուղղված քայլ, շատ ավելի է փոքրացնում կապը իրավաբանության հետ։ Բաբայանի ձերբակալման դեպքը անհասկանալի է, քանի որ կիրառվում է համաներման ակտը»,- Factor.am-ի հետ զրույցում ասաց «Իրավական ուղի» ՀԿ համահիմնադիր Ռուբեն Մելիքյանը։

Ըստ ՀՔԾ-ի հաղորդագրության` այս գործով փաստական տվյալներ են ձեռք բերվել այն մասին, որ պաշտոնատար անձինք Սահմանադրական դատարանի նախկին նախագահ Գագիկ Հարությունյանի լիազորությունները վայր դնելու գործընթացում, խմբային շահերից ելնելով, անձամբ, ինչպես նաև պաշտոնատար անձ չհանդիսացող աշխատակիցների միջոցով կատարել են պաշտոնեական կեղծիքներ, և, նկատի ունենալով, որ բացահայտվել է առերևույթ կատարված նոր հանցագործության դեպք, ՀՔԾ-ում Քրեական օրենսգրքի 314-րդ հոդվածի 1-ին մասով հարուցվել է նոր քրեական գործ, որը միացվել է իշխանությունը յուրացնելու դեպքի առթիվ հարուցված քրեական գործին:

Գագիկ Հարությունյանը լիազորությունները վայր է դրել 2018թ․-ի մարտին: Համաներման ակտը տարածվում է մինչև 2018-ի հոկտեմբերի 21-ը ներառյալ կատարված, նույն օրենքով սահմանված արարքների, այդ թվում`պաշտոնեական կեղծիքի վրա: Արսեն Բաբայանը ձերբակալվել է այնպիսի ենթադրյալ արարքի կասկածանքով, որի վրա առերևույթ համաներում է կիրառելի:

Իրավապաշտպան Ռուբեն Մելիքյանն ասում է՝ Բաբայանին ձերբակալելով փորձում են մութ սենյակում սև կատու որսալ։ Մելիքյանի խոսքով՝ այս քրեական գործը ամենաքաղաքականացված գործերից մեկն է․ « Եթե լիներ ամենաքաղաքականացված գործերի մրցանակաբաշխություն, ապա այս գործը լուրջ հաջողություն կգրանցեր այդտեղ»։

Մինչդեռ իշխող «Իմ քայլը» խմբակցության անդամ Նազելի Բաղդասարյանը Factor.am-ին ասաց՝ Բաբայանի գործը քաղաքական իշխող ուժի հետ չպետք է կապել։ Նա այս գործում քաղաքական հետապնդում չի տեսնում։

Իր կուսակցի հետ համակարծիք է նաև ԱԺ փոխնախագահ Ալեն Սիմոնյանը։ Նա էլ լրագրողների հետ զրույցում պնդեց՝ քաղաքական հետապնդման մասին խոսք լինել չի կարող, ասաց Բաբայանի ձերբակալման լուրն էլ ցավով է ընդունել․ «Սխալ, անհամաչափ լինել, ամեն ինչ հնարավոր է, բայց որևիցե քաղաքական միջամտություն Հայաստանի Հանրապետությունում չի եղել, և չի կարող լինել, ես ձեզ վստահեցնում եմ։ Ցավով եմ իմացել այդ լուրը, բայց վստահեցնում եմ, նման բանը բացառվում է»։

ԱԺ «Լուսավոր Հայաստան» խմբակցության ղեկավար Էդմոն Մարուքյանը լրագրողների հետ զրույցում ասաց՝ իր համար անհասկանալի է Արսեն Բաբայանի ձերբակալումը այն պարագայում, երբ կիրառելի է համաներման ակտը․ «Արսեն Բաբայանի գործը ապագա չունի, որովհետև ընկնելու է համաներման տակ»:

Նշենք նաև, որ այսօր դատարանը կքննի Բաբայանի ձերբակալման որոշման դեմ պաշտպանների ներկայացրած բողոքը։

Մեզ չհաջողվեց ՀՔԾ-ից ճշտել, թե արդյոք իրենք կներկայացնե՞ն կալանքի միջնորդություն, թե՝ ոչ։

Մանրամասները՝ տեսանյութում։

Լիլիթ Շաբոյան