Քաղաքականություն
22.10.2019 | 12:45Նիկոլ Փաշինյանը հայտարարում էր, որ հայ-ռուսական հարաբերությունները փայլուն են, արցախյան հիմնահարցում ինքը պետք է բերի իր նոր հայեցակարգը: Մենք այդպես էլ իր հայեցակարգը չտեսանք: Այս մասին լրագրողների հետ հանդիպմանն ասաց ՀՀԿ խոսնակ Էդուարդ Շարմազանովը:
«Միգուցե այդ հայեցակարգն Ալիևին կիրթ և նորմալ համարելն է կամ Դուշանբեի վերելակում մութ պայմանավորվածությունների ձեռքբերումը: Բայց մի բան ակնհայտ է, որ, դժբախտաբար, առաջին անգամ մեր դաշնակից երկիրը իր ԱԳ նախարար Լավրովի շուրթերով «Վալդայ»-ի ֆորումում ուղիղ մեղադրանք է հնչեցնում բանակցությունները ապակառուցողական հուն տանելու համար Հայաստանի ղեկավարությանը: Ո՛չ Տեր-Պետրոսյանի, ո՛չ Քոչարյանի, ո՛չ Սերժ Սարգսյանի իշխանության ժամանակաշրջանում համանախագահ որևէ երկրի ԱԳ նախարար Հայաստանի իշխանությունների հասցեին ուղիղ նման մեղադրանք չի հնչեցրել»,- ասաց Շարմազանովը:
Նրա խոսքով՝ եթե ապրիլյան պատերազմից հետո բոլորը բոլորը մեղադրում էին Ադրբեջանին, այդ թվում՝ ՀԱՊԿ գլխավոր քարտուղար Բորդյուժան այդ ընթացքում նշեց, որ Ադրբեջանի գործողությունները սադրանք են Հայաստանի հանդեպ Չինարիի դեպքից հետո, երբ ռուսաստանցի համանախագահ Մերզլյակովը ուղիղ նշեց, որ Արցախը ուշ թե շուտ պետք է վերադառնա բանակցային սեղան, այսօր մենք տեսանք, որ Նիկոլ Փաշինյանի հայտարարությունից հետո համանախագահ երկրները դեղին քարտ ցույց տվեցին Փաշինյանին, իսկ Սերգեյ Լավրովն ուղիղ տեքստով մեղադրանք հնչեցրեց Հայաստանի իշխանության հասցեին՝ բանակցությունները ապակառուցողական հուն տանելու մեջ:
«Սա քարտ-բլանշ է Ադրբեջանին, և սրա մեղավորն այսօրվա ապաշնորհ իշխանություններն են»,- հայտարարեց Էդուարդ Շարմազանովը:
Մանրամասները՝ տեսանյութում:
