Քաղաքականություն
18.10.2019 | 18:14
Amnesty International իրավապաշտպան կազմակերպությունը զեկույց է հրապարակել Սիրիայի տարածքում Թուրքիայի գործողությունների մասին՝ դրանք ռազմական հանցագործություն որակելով: Այս մասին գրում է ՍԱՆԱ-ն՝ վկայակոչելով AFP-ն:
Զեկույցի համաձայն՝ թուրքական ուժերն ու դրանց հետ կապված խմբավորումներն անտեսել են քաղաքացիական անձանց կյանքի իրավունքը վտանգավոր խախտումների և ռազմական հանցագործությունների միջոցով, այդ թվում՝ սպանության և ագրեսիայի, որոնց զոհ են դարձել խաղաղ բնակիչներ:
Amnesty International-ը ներկայացրել է առողջապահության ոլորտի և մարդասիրական կազմակերպությունների 17 աշխատակիցների, փախստականների վկայություններ, որոնց կցել է տեսագրություններ և բժշկական եզրակացություներ:
Կազմակերպության հաշվետվությունում նշվում է, որ հավաքված տեղեկատվությունը համոզիչ ապացույցներ է ներկայացնում բնակելի շրջանների ուղղությամբ հարձակումների, ինչպես նաև զանգվածային սպանությունների մասին:
Amnesty International-ի գլխավոր քարտուղար Կումի Նայդուն Թուրքիային է պատասխանատու համարում զինված խմբավորումների գործողությունների համար, որոնք ավելի վաղ լուրջ խախտումներ են թույլ տվել Աֆրինում, և թուրքական կողմին կոչ արել դադարեցնել այդ հանցագործությունները:
