28.11.2024 | 19:39
Ռոբերտ Քոչարյանի նոր մեղադրանքով վերագրվող արարքի վաղեմության ժամկետն անցած է
Թուրքիայի հետ պայմանավորվածությունն ազդակներ է ուղարկում, որ ԱՄՆ-ի խոսքին չի կարելի հավատալ. կոնգրեսականներ
Քաղաքականություն
18.10.2019 | 15:15
ԱՄՆ Կոնգրեսի ներկայացուցիչների պալատի խոսնակ Նենսի Փելոսին և Սենատի դեմոկրատների առաջնորդ Չաք Շումերը կարծում են, որ Սիրիայի հարցով թուրք-ամերիկյան պայմանավորվածությունները խաթարում են Միացյալ Նահանգների արտաքին քաղաքականության հանդեպ վստահությունը: ՏԱՍՍ-ի փոխանցմամբ՝ այս մասին նշվում է օրենսդիրների համատեղ հայտարարությունում:
«Նախագահ Թրամփի որոշումը՝ հետքայլ անել մեր քուրդ գործընկերների վրա դաժան հարձակման համար Թուրքիայի դեմ պատժամիջոցներ սահմանելու հարցում, լրջորեն խաթարում է ամերիկյան արտաքին քաղաքականության հանդեպ վստահությունը և մեր դաշնակիցներին, ինչպես նաև թշնամիներին ազդակներ է ուղարկում այն մասին, որ մեր խոսքին չի կարելի հավատալ»,- պնդել են Փելոսին և Շումերը:
Նրանց համոզմամբ՝ Թուրքիայի նախագահի ոչնչից հետ չի կանգնել, իսկ ԱՄՆ նախագահը նրան ամեն ինչ տվել է:
Փելոսին և Շումերը կարծում են, որ ԱՄՆ նախագահը նպաստել է քաոսի հետագա սրմանը և Սիրիայում անվտանգության բացակայությանը, ինչի արդյունքում տասնյակ անմեղ քաղաքացիական անձինք են զոհվել, իսկ հարյուր հազարավորները ստիպված են լքել տները:
Նրանք նաև տեղեկացրել են, որ հաջորդ շաբաթ Ներկայացուցիչների պալատը Թուրքիայի նկատմամբ «պատժամիջոցների կոշտ երկկուսակցական փաթեթ կընդունի»:
Հիշեցնենք, որ նախօրեին ԱՄՆ փոխնախագահ Մայք Փենսը Թուրքիայի նախագահ Ռեջեփ Թայիփ Էրդողանի հետ բանակցությունների արդյունքներով հայտարարել էր, որ երկու երկրները Սիրիայում հրադադարի շուրջ համաձայնություն են ձեռք բերել:
Թուրքիան պարտավորվել է 120 ժամով դադարեցնել ռազմական գործողությունները՝ քրդական կազմավորումներին հնարավորություն տալով լքել անվտանգության գոտու տարածքը: Միաժամանակ, Վաշինգտոնը, ըստ Փենսի, քրդական կազմավորումներից երաշխիքներ է ստացել, որ կազմակերպված կհեռանան Թուրքիայի հետ սահմանից:
