12.06.2026 | 22:09
Մեր աշխատանքը չի ավարտվում միայն ընտրության օրով, շարունակում ենք աշխատանքը, կլինեն նոր բացահայտումներ․ ՆԳ նախարար
Գարեգին Նժդեհի մասին հարցը անհրաժեշտ է պատմական տեսակետից դիտարկել. Մարիա Զախարովա
Քաղաքականություն
18.10.2019 | 10:11
ՌԴ ԱԳՆ պաշտոնական ներկայացուցիչ Մարիա Զախարովան կարծում է, որ Գարեգին Նժդեհի մասին հարցը անհրաժեշտ է պատմական տեսակետից դիտարկել։ Այս մասին նա հայտարարել է՝ պատասխանելով Արմավիրում իրավիճակի մասին հարցին, որտեղ տեղի բնակիչները, իբր, պահանջում են հայկական եկեղեցուց հանել Գարեգին Նժդեհի պատվին դրված հուշատախտակը, և նրանց այդ հարցում խոստացել է աջակցել պատգամավոր Լեոնիդ Կալաշնիկովը։
Զախարովան նշել է, որ տեղյակ չէ հենց այդ կոնկրետ իրավիճակից։ «Եթե այդ հարցն ավելի գլոբալ ուսումնասիրենք, ապա, իմ կարծիքով, անհրաժեշտ է այն պատմական տեսակետից դիտարկել։ Մենք արդեն այդ մասին մեր կարծիքը հայտնել ենք։ ՌԴ ԱԳՆ-ի դիրքորոշմանը կարելի է ծանոթանալ հաստատության կայքում տեղադրված համապատասխան զեկույցում։ Այդ գնահատականն արդիական է»,- նշել է նա։
Զախարովայի հայտարարությանը ֆեյսբուքյան գրառմամբ արձագանքել է ՀՀԿ փոխնախագահ Արմեն Աշոտյանը՝ միաժամանակ հիշեցնելով, որ նման հայտարարություն ՌԴ ԱԳՆ խոսնակն արել է նաև 2016 թվականի հունիսի 10-ին՝ արժանանալով հայ հանրության արձագանքին, որ դա Հայաստանի ներքին գործն է:
Աշոտյանը նաև ընդգծել է, որ Գարեգին Նժդեհի անունը վարկաբեկելու գործով ակտիվորեն զբաղվում է ադրբեջանական քարոզչամեքենան, իսկ հակահայ մանիպուլյացիաների գագաթնակետը դարձավ Աշխաբադում Ադրբեջանի նախագահ Իլհամ Ալիևի սկանդալային ելույթը: «Վերջին տասնամյակում Ռուսաստանի ԱԳՆ-ն իր հրապարակային փաստաթղթերում և զեկույցներում չի անդրադարձել Գարեգին Նժդեհի թեմային: Ինչո՞վ բացատրել Ձեր հռետորաբանության փոփոխությունը հիմա»,- գրել է Արմեն Աշոտյանը:
Հիշեցնենք, որ Գարեգին Նժդեհի մասին Ալիևը խոսել էր Աշխաբադում՝ ԱՊՀ երկրների ղեկավարների գագաթնաժողովի ժամանակ՝ Հայաստանի իշխանություններին մեղադրելով «նացիզմը հերոսացնելու» համար: Այս հայտարարությանը հետևել էր ՀՀ վարչապետ Նիկոլ Փաշինյանի կոշտ արձագանքը՝ պատմական փաստերը չխեղաթյուրելու կոչով:
