Հասարակություն
17.10.2019 | 13:39«Զանգեզուրի պղնձամոլիբդենային կոմբինատին» պատկանող Արծվանիկի պոչամբարի խողովակաշարից արտահոսք է եղել և հոսքաջրերը լցվել են Ողջի գետը, անմիջապես պոչամբարից չի: Այս մասին Կառավարության նիստից հետո լրագրողների հետ զրույցում նշեց շրջակա միջավայրի նախարար Էրիկ Գրիգորյանը:
Նրա խոսքով, բնապահպանական և ընդերքի տեսչական մարմնի աշխատակիցները փորձանմուշներ են վերցրել, առողջապահության տեսչությունը նույնպես այնտեղ է:
«Ամեն մեկն իր մասով գործը կանի: Բնապահպանական օրենսդրությունը սահմանում է պատիժների այն չափը, վնասների փոխհատուցման չափը, որը կհաշվարկեն և կներկայացնեն: Խողովակի անցքը փակված է, կարծում եմ՝ էլ չի հոսում: Աղտոտման ծավալները և վնասի աստիճանը տեսչական մարմինը պետք է իրականացնի վարույթի շրջանակում և հաշվարկի գործող օրենսդրության»,-ասաց նախարարը:
Նա հավելեց, որ բնապահպանական օրենսդրությամբ ջրի աղտոտման համար վնասների փոխհատուցման շատ ծիծաղելի չափեր են նախատեսված. «Ներկայում մենք վերանայում ենք այդ համակարգը: Նախկինում էլ եղել են վթարներ, հաշվարկել են վնասը, ասենք՝ 500 հազար դրամ և դրանով փակվել է»:
Էրիկ Գրիգորյանը նշեց, որ այդ խողովակաշարը Քաջարանից տասնյակ կիլոմետրերով անցնում է, հասնում է մինչև Արծվանիկի պոչամբար: «Գուցե ընթացիկ վերանորոգումներ լինում են, բայց պարբերաբար այսպիսի վթարներ լինում են: Իհարկե, մեղավորությունը գործարանինն է»,- ասաց նա:
Անդրադառնալով Զանգեզուրի պղնձամոլիբդենային կոմբինատի Արծվանիկի պոչամբարի խողովակաշարի վթարին՝ նախարարը նշեց, որ այդ խողովակաշարը կառուցվել է ԽՍՀՄ վերջին տարիներին, երբ որոշվել է Զանգեզուրի պղնձամոլիբդենայինի պոչերը տասնյակ կմ-ով խողովակներով տեղափոխվում են Արծվանիկի պոչամբար:
Էրիկ Գրիգորյանը նշեց, որ հանքարդյունաբերող ընկերություններն իրենց նախարարության նկատմամբ ունեն պարտավորություններ. «Մեր հանդեպ պարտավորություններ ունեն, որ աղտոտում չլինի, չափաքանակներից ավելի ջրառ չլինի: Բայց քանի որ կարգավորումները մեծ մասամբ ֆիկտիվ բնույթ են կրել, ծիծաղելի ցածր են եղել, շատ դեպքերում շահավետ է եղել տեխնիկական լուծումների չգնալ, և եթե լինի վթար, վճարել այդ վթարի 500-600 հազար դրամը և չանհանգստանալ»:
Մանրամասները՝ տեսանյութում:
Նարեկ Գրիգորյան
