01.09.2026 | 21:26
Փաշինյան-Պուտին հանդիպում Բիշքեկում. ՈՒՂԻՂ
Ադրբեջանը նոտա է ուղարկել ՌԴ ԱԳՆ-ին՝ բողոքելով Արցախ Զատուլինի այցի դեմ
Քաղաքականություն
16.10.2019 | 14:22
ՌԴ-ում Ադրբեջանի դեսպանատունը պաշտոնական նոտա է ուղարկել Ռուսաստանի ԱԳՆ-ին՝ կապված Պետդումայի ԱՊՀ-ի, եվրասիական ինտեգրման և հայրենակիցների հարցերի հանձնաժողովի փոխնախագահ Կոնստանտին Զատուլինի այցի հետ: Այս մասին ՏԱՍՍ-ին հայտնել են Մոսկվայում Ադրբեջանի դեսպանատնից:
Այստեղ նշել են, որ ՌԴ ԱԳՆ «պաշտոնական նոտա է ուղարկվել, որն արտացոլում է ադրբեջանական կողմի մտահոգությունը»՝ կապված Լեռնային Ղարաբաղում կազմակերպված միջոցառումներին Զատուլինի մասնակցության հետ:
Նոտայում դեսպանատունը ռուսական կողմին խնդրել է գնահատական տալ ԼՂ հակամարտության վերաբերյալ պատգամավորի արտահայտություններին:
Նշենք, որ անցյալ շաբաթ Կոնստանտին Զատուլինը Ստեփանակերտում մասնակցել է «Համագործակցություն հանուն արդարության և խաղաղության» խորագրով Արցախի բարեկամների համաժողովին:
Մինչ այդ էլ, հիշեցնենք, Բաքուն Արցախ այցելելու «սև ցուցակում» էր ներառել ԱՄՆ կոնգրեսական Ջուդի Չուին:
