Արմեն Թավադյանը չէր եկել դատարան. Վարդգես Գասպարին ընդդեմ Արմեն Թավադյանի նիստը հետաձգվեց

Երևանի ընդհանուր իրավասության դատարանի Կենտրոնի նստավայրում կայացավ Վարդգես Գասպարին ընդդեմ Արմեն Թավադյանի գործով առաջին դատական նիստը:

«Հինգերորդ ալիքի» սեփականատեր Արմեն Թավադյանը, հիշեցնենք, մեղադրվում է Քրեական օրենսգրքի 258-րդ հոդվածի 4-րդ մասով, այն է՝ որպես զենք օգտագործվող առարկայի գործադրմամբ խուլիգանություն կատարելը:

Դատական նիստին չէին ներկայացել ամբաստանյալը, պաշտպանը ու վկան:

Պաշտպան Հովհաննես Խուդոյանը ներկայացրել էր գրություն, համաձայն որի՝ ինքն այլ դատական նիստի է և այսօր մասնակցել չի կարող, նա նշել էր, որ ամբաստանյալ Թավադյանը ևս նույն պատճառով չի մասնակցել նիստին:

Վարդգես Գասպարիի պաշտպան Տիգրան Եգորյանն ասաց, որ Խուդոյանի հայտարարությունը մասամբ է համապատասխանում իրականությանը, քանի որ նրա նշած դատական նիստը՝ Քոչարյանի և մյուսների գործով, հետաձգվել է և ինքն էլ էր դրան մասնակցում, բայց դա չի խոչընդոտել իր ներկայանալուն:

Անդրադառնալով Արմեն Թավադյանի բացակայությանը, Եգորյանն ասաց, որ այն պետք է համարել անհարգելի, քանի որ նա Քոչարյանի և մյուսների գործով կարգավիճակ չունի, այլ երկրպագուների թիմում է:

Դատավոր Ֆարխոյանն ասաց, որ հավաստագրերը առկա չեն գործի նյութերում և այդ պատճառով կողմերին նիստի մասին ևս մեկ անգամ կծանուցեն:

Այսօրվա դատական նիստը հետաձգվեց, որոշվեց հաջորդ նիստը նշանակել նոյեմբերի 13-ին ժամը՝ 15-ին:

Հիշեցնենք, որ միջադեպը տեղի էր ունեցել Ռոբերտ Քոչարյանի գործով մայիսի 13-ի դատական նիստի օրը, երբ Գասպարիին Քոչարյանի աջակիցներից մեկը շշով հարվածել էր և խլել պաստառը: Գասպարիի պնդմամբ՝ հարվածողը Արմեն Թավադյանն էր, մինչդեռ վերջինս պնդում է, որ ինքն առնչություն չի ունեցել:

Լիլիթ Շաբոյան