17.12.2025 | 14:50
Նոտարական գործարքներ՝ թվային միջավայրում․ ինչ փոփոխություններ են սպասվում Կադաստրի կոմիտեում․ ՏԵՍԱՆՅՈՒԹ
Սահմանադրական դատարանը պետք է լուծարվի. Սերգեյ Բագրատյան. ՏԵՍԱՆՅՈՒԹ
Քաղաքականություն
15.10.2019 | 14:12
Հանրային վստահություն ունենալը կամ չունենալը պարզելու համար պետք է հանրաքվե անցկացնել: Այսօր ԱԺ-ում լրագրողների հետ զրույցում նման տեսակետ հայտնեց ԱԺ ԲՀԿ խմբակցության պատգամավոր Սերգեյ Բագրատյանը՝ անդրադառնալով Սահմանադրական դատարանի հեղինակության մասին հարցին:
«Եթե մենք ասում ենք, որ ընդհանուր դատական համակարգի նկատմամբ անվստահություն կա, ապա դա վերաբերում է բոլորին»,- շարունակեց նա:
Ինչ վերաբերում է ՍԴ նախագահ Հրայր Թովմասյանի լիազորությունների դադարեցման դիմումը վարույթ չընդունելու՝ ՍԴ որոշմանը, Բագրատյանն ասաց, որ սա իր համար անակնկալ չէ:
«Վարույթ չեն ընդունել ու պետք է մեկնաբանեն, թե ինչու։ Սպասելի էր մեզ համար, քանի որ մենք գիտեինք, որ այսպես է լինելու։ Եթե ՍԴ է ներկայացվում իրավական թերի հիմքով փաստաթուղթ, բնականաբար, կմերժեին։ Մենք արդեն ասել ենք, որ թույլ է քավոր-սանիկ հարաբերությունների դրույթը, ժամկետների հետ կապված խնդիր կար և այլն»,- շարունակեց Բագրատյանը։
Պատգամավորի խոսքով՝ խնդրին պետք է տրվի համակարգային լուծում, քանի որ անձերով բան չի փոխվելու։ Համակարգային լուծում ասելով՝ Սերգեյ Բագրատյանը նկատի ունի գերագույն դատարանի ստեղծումը:
«Անձերով բան չի փոխվելու, Հրայր Թովմասյանը չլինի, Ալվինա Գյուլումյանը լինի, դրանից ի՞նչ փոխվեց մեր կյանքում։ Խնդիրը համակարգի մեջ է, ոչ թե Հրայր Թովմասյանի։ Համակարգային լուծում է պետք, որի մասին արդեն ասել եմ։ Պետք է ՍԴ-ն լուծարվի ու միավորվի Վճռաբեկ դատարանին, դառնան Գերագույն դատարան։ Մեր նման փոքր երկրի համար չորս ատյանի դատարան ունենալը շռայլություն է»,- եզրափակեց Սերգեյ Բագրատյանը։
Հիշեցնենք, որ Սահմանադրական դատարանը 2019 թվականի հոկտեմբերի 14-ի աշխատակարգային նիստում որոշում է կայացրել «Ազգային ժողովի դիմումի հիման վրա Սահմանադրական դատարանի դատավոր Հրայր Թովմասյանի լիազորությունները դադարեցնելու վերաբերյալ» գործի քննությունը մերժել։
Մանրամասները՝ տեսանյութում:
Նարեկ Կիրակոսյան
