30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Դատապարտում ենք ԱՄՆ կառավարությանը, որը քրդերին մենակ թողեց թուրքական թնդանոթների դեմ. Կնյազ Հասանով
Քաղաքականություն
15.10.2019 | 13:51
Դատապարտում ենք ԱՄՆ կառավարությանը, որը մենակ թողեց քրդերին թուրքական թնդանոթների առջև: Այսօր ԱՄՆ դեսպանատան շենքի մոտ Սիրիայում թուրքական ռազմական գործողության դեմ կազմակերպված Հայաստանի քրդական համայնքի ակցիայի ժամանակ հայտարարեց համայնքի ներկայացուցիչ, ՀՀ ԱԺ «Իմ քայլը» խմբակցության պատգամավոր Կնյազ Հասանովը:
«Եթե հարյուր տարի առաջ թուրքական իշխանությունը նույն ձևով վերացրեց 1.5 մլն հայերի և դա մարսեց, այսօր նույն իրադարձությունը կատարում են քրդերի նկատմամբ: Այսօր Թուրքիան ուզում է աշխարհի երեսից վերացնել քուրդ ժողովրդին: Ամեն տեղ, որտեղ քրդեր կան, ագրեսիա են կազմակերպում»,- ասաց Հասանովը:
Նրա խոսքով՝ քուրդ ժողովուրդը վճռական է՝ մինչև վերջ կանգնելու, դատապարտելու իրեն կեղեքողներին, իր թշնամիների անմարդկային քայլը. «Մենք դատապարտում ենք թուրքական ցեղասպան, մարդասպան քաղաքականությունը: Եթե հայերի նկատմամբ կատարված ցեղասպանությունն անտեսվեց միջազգային հանրության կողմից, այսօր նույն ձևով անտեսվում է միջազգային հանրության, գերտերությունների կողմից քրդերի դեմ կատարվածը»:
Կնյազ Հասանովի խոսքով՝ ԱՄՆ-ն հովանավորում էր Սիրիայի քրդերին, հորդորում էր գնալ ԻԼԻՊ-ի իսլամականների դեմ կռվելու, բայց այսօր մենակ է թողել թուրքական թնդանոթների դեմ: Նա նշեց, որ գերտերություններն այսօր լուռ ու համր են դարձել, մի քանիսն էլ թեև դատապարտել են թուրքական իշխանությանը, բայց ոչ մի գործնական քայլ չեն արել:
«Մենք աշխարհի խաղաղասեր ժողովուրդներին, միջազգային կիրթ հանրությանը կոչ ենք անում՝ բռնել թուրքերի մարդասպան, ցեղասպան ձեռքը և քրդերին թողնել իրենց բնակավայրերը»,- հայտարարեց Կնյազ Հասանովը:
Նշենք, որ ակցիայի մասնակիցները նաև նամակ էին պատրաստել, որը հանձնեցին Հայաստանում ԱՄՆ դեսպանատան ներկայացուցչին:
