29.03.2026 | 10:52
ԵՄ առաքելությունը նախազգուշացրել է Կարմիր ծովում հուսիների նոր սպառնալիքի մասին
Մանվել Գրիգորյանը լավագույն հիվանդանոցում է. դատախազը առարկեց գեներալին ազատելու միջնորդության դեմ. ՏԵՍԱՆՅՈՒԹ
Հասարակություն
15.10.2019 | 13:29
ԵԿՄ նախկին նախագահ Մանվել Գրիգորյանի և նրա կնոջ՝ Նազիկ Ամիրյանի գործով մեղադրող դատախազ Վահե Դոլմազյանն այսօրվա դատական նիստում առարկեց պաշտպանական կողմի միջնորդության դեմ՝ վերացնել Գրիգորյանի նկատմամբ ընտրված խափանման միջոց կալանավորումը և կիրառել հինգ միլիոն դրամ գրավ։
«Պաշտպանական կողմն ամեն անգամ միջնորդություն է ներկայացնում՝ նույն բովանդակությամբ, թե Գրիգորյանի առողջական վիճակի մեջ վատթարացում է արձանագրում։ Մանվել Գրիգորյանը գտնվում է Հայաստանի լավագույն բժշկական կենտրոններից մեկում, դա նրա ընտրությունն է։ Մանվել Գրիգորյանը հրաժարվել էր դեղորայք ընդունել, երբ Դատապարտյալների հիվանդանոց էր տեղափոխվել՝ պնդելով, որ պետք է գտնվի «Նաիրի» բժշկական կենտրոնում։ Այն հիվանդանոցը, որտեղ գտնվում է Գրիգորյանը, ինքն է ընտրել։ Մանվել Գրիգորյանն այս պահին բժիշկների շուրջօրյա հսկողության տակ է։ Պաշտպանների միջնորդությունը ենթակա է մերժման»,- ասաց դատախազը։
Ըստ պաշտպանների՝ Մանվել Գրիգորյանը լույսի երես չի տեսնում և առողջական վիճակը գնալով վատանում է։ Բժշկական կոնսիլիում է հրավիրվել, որը, ըստ փաստաբանների, փաստել է նրա առողջության բացասական դինամիկան։
«Առողջական վիճակով պայմանավորված՝ անձը չի կարողանում մասնակցել նիստերին։ Իրավունքի խախտման մասին ենք խոսում։ Ցանկացած կալանավոր, որը գտնվում է ՔԿՀ-ում և լավ է զգում, զրկված չէ տեսակցությունից և զբոսանքից։ Կողմնակից չեմ, որ ՄԻԵԴ-ը որոշում կայացնի այս հարցով: Մենք խոսում ենք կյանքի, չխոշտանգվելու իրավունքի մասին։ Մարդը տասը դատական նիստի չի կարողանում մասնակցել, ծանր հիվանդությունների պատճառով տևական ժամանակ չի կարողանում գալ դատարան։ Խնդրում եմ բավարարել կալանքը գրավով փոխարինելու միջնորդությունը»,- ասաց Գրիգորյանի փաստաբան Արսեն Մկրտչյանը։
Դատարանը հեռացավ խորհրդակցական սենյակ՝ միջնորդության վերաբերյալ որոշումը կայացնելու: Այն կհրապարակվի ժամը 14:00-ին։
Մանրամասները՝ տեսանյութում:
Ռոբերտ Անանյան
