Գախարիայի հետ քննարկման հարցերից մեկը նաև ցորենի տարանցման խնդիրը պետք է լինի․ Ջոնի Մելիքյան. ՏԵՍԱՆՅՈՒԹ

Վերին Լարսի այլընտրանքը ծովն է, և առաջին հերթին պետք է հասկանալ, թե այդ ուղղությամբ ինչ ենք անելու: Վրաստանի վարչապետ Գեորգի Գախարիայի՝ Հայաստան այցի նախօրեին լրագրողների հետ հանդիպմանն անդրադառնալով ռուս-վրացական սահմանով բեռնափոխադրումների համար առաջացող խնդիրներին՝ ասաց վրացագետ Ջոնի Մելիքյանը:

«Եթե մենք ունենում ենք լաստանավ, իսկ ՀՀ-ն կարող է դրա մասին մտածել, այն մեր բեռնափոխադրողներին հնարավորություն կտա այն ժամանակ, երբ Լարսում խցանումներ և խնդիրներ են, այդ հարցը լուծել: Ինչ վերաբերում է Լարսին, այնտեղ կա մեկ խնդիր, և դա ռուսական կողմի անցակետի արդիականացումն է: Մոտ ապագայում, որքանով ես եմ տեղյակ, դա տեղի չի ունենա»,- ասաց Ջոնի Մելիքյանը:

Նրա խոսքով, թեև քաղաքական գործիչներն ու փորձագետները խոսում են աբխազական երկաթուղու, հարավօսական ճանապարհի մասին, բայց պետք է մոռանալ այդ այլընտրանքի մասին, քանի որ Ռուսաստանի և Վրաստանի միջև քաղաքական լուրջ խնդիրներ կան:

Ինչ վերաբերում է Գախարիայի այցի ընթացքում քննարկվելիք հարցերի շրջանակին, Ջոնի Մելիքյանը կարծում է, որ պետք է անդրադարձ լինի նաև Վրաստանի տարածքով ցորենի տարանցման խնդրին. «Մինչև հոկտեմբերի 1-ն էր հերթական ժամկետը, որը երկարաձգել էին, բայց հոկտեմբերի 1-ից անցել է որոշ ժամանակ, ոչ մի լուր չկա»:

Վրաստանի կառավարությունը, հիշեցնենք, անցյալ տարի որոշում էր կայացրել սեպտեմբերի 15-ից արգելել երկրի տարածքում բեռնատարներով հացահատիկի տեղափոխումը, սակայն ավելի ուշ հայտարարվեց, որ որոշման իրագործումը հետաձգվել է: Մտահոգություններ էին հնչում, որ Վրաստանի տարածքում բեռնատարներով հացահատիկի տեղափոխման արգելքը կարող է նպաստել Հայաստանում հացի գնի թանկացմանը:

Մանրամասները՝ տեսանյութում: