Գումարները դուրս են գրվել և ուրիշ տեղ են գնացել. Հայկակ Արշամյան. ՏԵՍԱՆՅՈՒԹ

Ես կխուսափեմ գործից խոսել այն պատճառով, որ դա իրավապահ մարմինների գործն է և չեմ ուզում որևէ մեկի մասին մեղադրանք հնչեցնել, որովհետև դա դատարանն է որոշելու. այս մասին լրագրողների հետ հանդիպմանն ասաց «Հայաստան» համահայկական հիմնադրամի գործադիր տնօրեն Հայկակ Արշամյանը՝ անդրադառնալով հիմնադրամի նախկին գործադիր տնօրեն Արա Վարդանյանի նոր մեղադրանքին:

Հիշեցնենք, որ ԱԱԾ հաղորդագրության համաձայն՝ քրեական գործի նախաքննությամբ պարզվել են նոր հանգամանքներ, մասնավորապես` 2017 թվականի հոկտեմբերի 26-ին Արա Վարդանյանը` որպես հիմնադրամի տնօրեն, պայմանագիր է կնքել Արցախի Հանրապետության Ասկերանի, Շահումյանի, Մարտակերտի, Հադրութի, Քաշաթաղի և Մարտունու շրջանների վարչակազմերի կրթության բաժինների հետ 149 474 540 դրամի գույք մատակարարելու մասին, բայց չի մատակարարել, իսկ հիմնադրամից դուրս գրված գումարը յուրացնելու նպատակով կազմել է հանձնման-ընդունման կեղծ ակտեր:

«Հիմնադրամին հասցված վնասները պետք է վերականգնվեն, իսկ մեղավորները՝ պատժվեն: Ես չեմ կարծում, որ այդ դեպքը վնաս կհասցնի հիմնադրամ փոխանցումներին, այլ դրական զարգացում է: Որևէ անձի կամ անձերի բացասական գործունեությունը, որը եղել է նախկին մեծ կոռումպացված համակարգի շրջանակներում, չի կարող ազդեցություն ունենալ: Չեմ ուզում գործի մանրամասների մասին խոսել, բայց այն, ինչ հիմա ասվում է, ասվում է, որ ոչինչ չի արվել: Գումարները դուրս են գրվել և ուրիշ տեղ են գնացել»,- ասաց տնօրենը:

Մանրամասները՝ տեսանյութում:

Նարեկ Կիրակոսյան