08.11.2024 | 23:14
Վթար Աշտարակի խճուղում․ կա տուժած
Բրյուսելը պատասխանել է Էրդողանի՝ ԵՄ փախստականներին ազատ արձակելու սպառնալիքներին
Քաղաքականություն
11.10.2019 | 19:58
Բրյուսելում անընդունելի են համարում Թուրքիայի նախագահ Ռեջեփ Թայիփ Էրդողանի սպառնալիքները՝ սիրիացի փախստականներին Եվրոպա ազատ արձակելու վերաբերյալ, եթե Եվրամիությունը թուրքական ռազմական գործողությունը Սիրիայում անվանի ներխուժում: Rg.ru-ի փոխանցմամբ՝ այս մասին հայտարարել է ԵՄ ներկայացուցիչը:
Բացի այդ՝ Եվրախորհրդի ղեկավար Դոնալդ Տուսկը Էրդողանի խոսքերն անտեղի շանտաժ է անվանել, իսկ Գերմանիայի կառավարության պաշտոնական ներկայացուցչի տեղակալ Ուլրիկե Դեմերը հույս է հայտնել, որ Թուրքիան կշարունակի իրականացնել ԵՄ-ի հետ փախստականների վերաբերյալ համաձայնագիրը:
Թուրքիայի նախագահ Էրդողանը, հիշեցնենք, չորեքշաբթի հայտարարեց «Խաղաղության աղբյուր» գործողության մեկնարկի մասին՝ ուղղված Քրդական աշխատավորական կուսակցության և «Իսլամական պետություն» ահաբեկչական խմբավորման դեմ:
Նույն օրը թուրքական ավիացիան հարվածներ հասցրեց Ռաս էլ-Այնի ուղղությամբ, հարձակման է ենթարկվել նաև Թել Աբյադը: Դրանից հետո հաղորդվեց ցամաքային գործողության մեկնարկի մասին:
Դամասկոսում թուրքական գործողությունն ապօրինի ներխուժում են գնահատում: Հարևան մի շարք պետություններ էլ, ինչպես նաև ԵՄ անդամների մեծ մասը, դատապարտել են Անկարայի գործողությունները և լարվածության սրացումից խուսափելու կոչ արել:
