Լավրովը մեկնաբանել է Սիրիայում թուրքական ռազմական գործողությունը

Մոսկվան հասկանում է Անկարայի մտահոգությունները, սակայն դրանք պետք է կարգավորվեն՝ Դամասկոսի շահերը հաշվի առնելով: Մեկնաբանելով Սիրիայում Թուրքիայի ռազմական գործողությունները՝ այս մասին հայտարարել է ՌԴ ԱԳ նախարար Սերգեյ Լավրովը, գրում է ՌԻԱ Նովոստին:

«Մենք մշտապես՝ սիրիական ճգնաժամի հենց սկզբից, ուշադրություն ենք հրավիրել այն փաստի վրա, որ հասկանում ենք Թուրքիայի օրինական մտահոգությունն իր սահմանների անվտանգության համար: Միաժամանակ, մենք ամեն կերպ ընդգծել ենք այդ մտահոգությունները Դամասկոսի և Անկարայի միջև գոյություն ունեցող պայմանավորվածությամբ կարգավորելու անհրաժեշտությունը, այսպես կոչված՝ 1998 թվականի Ադանայի համաձայնագրով»,- հայտարարել է ռուսաստանցի դիվանագետը:

Նրա խոսքով՝ ՌԴ-ն ձգտելու է հասնել Թուրքիայի և Սիրիայի միջև երկխոսություն հաստատելուն. «Մենք հիմքեր ունենք ենթադրելու, որ դա բխում է երկու կողմերի շահերից: Միաժամանակ, պայմանավորվելու ենք այն մասին, որպեսզի, այնուամենայնիվ, կապեր հաստատվեն Դամասկոսի և քրդական այն կազմակերպությունների միջև, որոնք մերժում են ծայրահեղականությունն ու ահաբեկչական գործելաոճը»:

Հիշեցնենք, որ հոկտեմբերի 9-ին Թուրքիայի նախագահ Ռեջեփ Թայիփ Էրդողանը հայտարարել է Սիրիայի հյուսիսում «խաղաղության աղբյուր» գործողության մեկնարկի մասին, որն ուղղված է Թուրքիայում արգելված Քրդական աշխատավորական կուսակցության և «Իսլամական պետություն» ահաբեկչական խմբավորման դեմ: Թուրքական օդուժը նույն օրը հարվածներ է հասցրել Սիրիայի Հասակե նահանգի Ռաս էլ-Այն քաղաքին:

Ավիահարվածների է ենթարկվել նաև Սիրիայի Թել Աբյադ քաղաքը: Թուրքիայի ՊՆ-ի վերջին տվյալներով՝ գործողության մեկնարկից ի վեր թուրք զինվորականները հարվածներ են հասցրել Սիրիայի հյուսիսում քրդական կազմավորումների 181 թիրախների ուղղությամբ:

Սիրիական պետական հեռուստատեսության տվյալներով էլ՝ Ռաս էլ-Այն, Ղամիշլի, Դարբասիա և Ալ-Մաշրաֆա սահմանամերձ քաղաքների գնդակոծության հետևանքով 8 խաղա բնակիչ է զոհվել, 20-ը՝ վիրավորվել: