Գյումրիում դպրոցի բակից Բայրոնի բրոնզե արձանը գողացել են, հետո՝ վերադարձրել

Գյումրիի թիվ դպրոցի բակից անհայտ անձինք նախօրեին գողացել են լորդ Ջորջ Բայրոնի բրոնզե կիսանդրին, ավելի ուշ, սակայն, վերադարձրել են: Այս մասին Factor.am-ի հետ զրույցում ասաց դպրոցի տնօրեն Կարինե Մհլամյանը:

«Հավանաբար, դեպքը շաբաթ երեկոյան է եղել, որովհետև այդ օրը մինչև ժամը 16։00-ն տեխնիկական անձնակազմը դպրոցում է եղել Կիրակի առավոտյան, երբ տնտեսվարը բացել է դպրոցը, որպեսզի երեխաները միջոցառման համար փորձեր անեն, նկատել է, որ Բայրոնի կիսանդրին բակում չէ: Բնականաբար, ահազանգեցինք Ոստիկանություն: Երկու օր անցավ, հետո բերել և դրել են դպրոցի հետնամասի բակում՝ քարի վրա, հավանաբար՝ գիշերը», -ասաց Կարինե Մհլամյանը։

Նշենք, որ գողության դեպքի առիթով Ոստիկանության Կումայրիի բաժնում նյութեր են նախպատրաստվել: Կիսանդրին իրավապահների մոտ է, որոնք համապատասխան ուսումնասիրություններ են անում։ Արձանը գողացողների ինքնությունը դեռ չի պարզվել:

Հավելենք, որ Բայրոնի կիսանդրին փորձել են գողանալ դեռ մի քանի ամիս առաջ՝  թուլացնելով դրա հիմքերը։

«Մայիսին էլ փորձել էին թուլացնել արձանը: Մասնագետների միջոցով ամրացրինք, որ պատվանդանին ավելի ամուր լինի։ Այնպես էին թուլացել, որ եթե դիպչեին, կարող էր պոկվել ու ընկնել: Կամ էլ թուլացրել էին, չէին հասցրել տանել»,- տնօրենը։

Դպրոցը պատրաստվում է ուժեղացնել անվտանգության համակարգը՝ նման դեպքերի կրկնությունը բացառելու համար։

«Նախ մտածում ենք՝ արձանը դրսո՞ւմ թողնենք, թե՞ ներսում։ Գուցե շքամուտքում տեղադրենք, հարցը քննարկվում է։ Դպրոցի հսկողությունը պահակային ծառայությունն է իրականացնում, համակարգի միջոցով հետևում է, բայց շենք մտնելու դեպքում է ահազանգ լինում, ոչ բակի դեպքում։ Հիմա այդ ծառայությունը տեղադրում է տեսախցիկներ, որ գոնե հսկենք: Կփորձենք մի քանի տեսախցիկ էլ դպրոցի միջոցներով ունենալ, որովհետև տարածքը մեծ է»,- ասաց Կարինե Մհլամյանը։

Նշենք, որ Գյումրիի թիվ 20 դպրոցը երկրաշարժից հետո կառուցվել է Մեծ Բրիտանիայի կառավարության աջակցությամբ։ 1990-ին  դպրոցը բացել է Բրիտանիայի վարչապետ Մարգարետ Թետչերը: Ի նշան երախտագիտության՝ դպրոցը կոչել են Ջորջ Բայրոնի անունով։ Ի դեպ՝ Բայրոնի բրոնզաձույլ կիսանդրին  Անգլիայից է բերվել ու դպրոցի բացման օրից տեղադրված է կրթօջախի բակում:

Է.Չ.