Վրաստանում գնահատել են ՌԴ-ի հետ ավիահաղորդակցության դադարեցումից հետո կրած վնասները

Այս տարվա հուլիսին և օգոստոսին Վրաստանը ՌԴ-ի կողմից ավիաչվերթների արգելքի պատճառով շուրջ 113 միլիոն դոլար է կորցրել: «Իմեդի» հեռուստաընկերությանը տված հարցազրույցում հայտարարել է Վրաստանի զբոսաշրջության ազգային վարչակազմի ղեկավար Մարիամ Կվրիվիշվիլին, գրում է ՌԻԱ Նովոստին:

Նրա խոսքով՝ տարվա առաջին կեսին զբոսաշրջությունից ստացված եկամուտներն աճել են, այնպես որ Թբիլիսիում երրորդ եռամսյակում «աննախադեպ բարձր թվեր» էին սպասվում: Սակայն հուլիսին տուրիստական ոլորտի կորուստները կազմել են 57 միլիոն դոլար, իսկ օգոստոսին՝ 56 միլիոն։

Կվրիվիշվիլին նաև տեղեկացնում է, որ սեպտեմբերին տուրիստական հոսքը փոքր-ինչ աճել է, բայց դա չի արդարացնում երկրի ղեկավարության սպասելիքները, որը սովոր է «զբոսաշրջային հոսքի աճը երկնիշ թվերով տեսնել»:

«Սեպտեմբերին մեզ մոտ 20 տոկոսով նշվում է Ռուսաստանից զբոսաշրջային հոսքի կրճատում, դա, անշուշտ, ազդում է մասնավոր հատվածի, բիզնեսի և զբոսաշրջային արդյունաբերության վրա»,- նշել է նա:

Հիշեցնենք, որ հունիսի վերջին Թբիլիսիում հակառուսական բողոքի ակցիաներ սկսվեցին, որոնց առիթը ռուսական պատվիրակության մասնակցությունն էր Ուղղափառության միջխորհրդարանական վեհաժողովի նստաշրջանին: Ցուցարարներին վրդովվեցրել էր այն, որ կազմակերպության ղեկավար, ՌԴ Պետդումայի պատգամավոր Սերգեյ Գավրիլովը նստել է Վրաստանի խորհրդարանի խոսնակի աթոռին:

Վրաստանի մայրաքաղաքի կենտրոնում զանգվածային հանրահավաքներ անցկացվեցին, որի մասնակիցները փորձեցին գրավել խորհրդարանի շենքը: Ոստիկանության կողմից ուժի կիրառման արդյունքում տուժեց առնվազն 240 մարդ, իսկ մոտ 300-ը՝ ձերբակալվեց:

Այս իրադարձությունների ֆոնին ՌԴ նախագահը Վրաստանի հետ ավիահաղորդակցության արգելք սահմանեց։