Պատգամավորները քաղհասարակության ներկայացուցիչների հետապնդումը դատապարտող հայտարարություն են արել. ՏԵՍԱՆՅՈՒԹ

ԱԺ մարդու իրավունքների պաշտպանության և հանրային հարցերի մշտական հանձնաժողովում քննարկվում է քաղաքացիական հասարակության ներկայացուցիչների հետապնդման, հետամտման և նրանց շուրջ ատելության և անհանդուրժողականության մթնոլորտի հրահրման հարցը:

Հիմնական զեկուցող, ԱԺ «Իմ քայլը» խմբակցության պատգամավոր Մարիա Կարապետյանը, ներկայացնելով մի քանի պատգամավորների հեղինակած հայտարարության տեքստը, նշեց, որ այն այլ պատգամավորների կողմից միանալու համար բաց է:

«Վերահաստատելով մեր հավատարմությունը ՀՀ Սահմանադրության նախաբանում ամրագրված քաղաքացիական համերաշխության նպատակին, վերահաստատելով մեր հավատարմությունը կարծիքի արտահայտման և հավաքների ազատության սահմանադրական երաշխիքներին, ինչպես նաև խտրականության սահմանադրական արգելքին՝ խստորեն դատապարտում ենք քաղաքացիական հասարակության և նրանց ներկայացուցիչների, լրատվության միջոցների և լրագրողների, դատական իշխանության ներկայացուցիչների, իրավապաշտպանների, այլ անհատների, խմբերի նկատմամբ հետապնդման, ահաբեկման, սպառնալիքի և ոտնձգության դրսևորումները, ատելության և թշնամանքի հրահրումը և խրախուսումը այն բոլոր դեպքերում, երբ այդ գործողությունների մեջ կա հանցակազմ, ակնկալում ենք իրավապահ մարմինների անհապաղ գործողությունները»,- նշեց նա:

Կարապետյանի խոսքով՝ յուրաքանչյուր ոք իրավունք ունի սեփական կարծիք ունենալ և այն ազատ արտահայտել, ինչպես նաև փնտրել, ստանալ և տարածել գաղափարներ, կազմակերպել և մասնակցել խաղաղ, առանց զենքի հավաքներ:

«Այս երկու ազատությունները կարող են սահմանափակվել միայն օրենքով»,- ասաց նա:

Մարիա Կարապետյանն ասաց, որ որոշակի ակցիաների շրջանակում հնչում են կարգախոսներ, որոնք համակրելի են հանրության այս կամ այն շրջանակների կողմից, սակայն այդ ակցիաների ժամանակ օգտագործվում են մեթոդներ, որոնք դատապարտելի են: «Այստեղ շատ կարևոր է ազատ խոսքի և մարդու արժանապատվության միջև նուրբ գիծը պահպանելը»,- ասաց նա:

Մանրամասները՝ տեսանյութում:

Նարեկ Կիրակոսյան